一周三件：輕注買大昌行
■大昌行本身主打汽車代理、食品零售等，現拓展電貿業務，極具潛力彈出。圖為行政總裁葉滿堂。 資料圖片
大昌行（1828）下周二派2015年成績單，專業評估成績一般過一般，但大昌行喺電貿拓展勁有優勢，預估PB，又比上市以嚟平均值平近60%，比起阿里巴巴，更大折讓近90
%。大昌行主打汽車代理、食品零售、製造、分銷。上年上半年，內地汽車業唔掂檔，大昌行亦走唔甩，盈利倒退近35%到2.8億元。專業評估集團上年全年EPS仍然會倒退12%到0.36元。
拓電貿博發圍
但大昌行1年累跌近40%，現價3.15元挨近五年底，就算以預測倒退EPS計，2015年都係得8.8倍PE，股價咁插法，都反映得七七八八。再講，專業評估大昌行今年turnaround，EPS0.41元，增長14%，得番7.7倍PE。
大昌行2014年尾推出電貿平台「大昌優品」。報載因涉及進口商品稅務因素，故內地可搞到跨境進口網購嘅，只係極少數，而大昌行同阿里巴巴係其一。啱啱呢期，大昌行亦同中糧集團旗下「我買網」簽訂戰略協議，發展全球食物產業鏈。
睇到係，大昌行憑住本身同合作夥伴優勢，搞電貿，勁有潛力發圍。而上年全國網購零售額，達到3.8萬億元人仔，電貿呢一瓣，亦食住大潮流。
大昌行市值58億元，唔夠阿里巴巴市值1.3萬億元0.5%，場內預估大昌行明年0.53倍PB，比阿里巴巴4.2倍PB，平咗87%。大昌行電貿搞掂，當翻一番到6蚊樓上計數，市值100億元多啲，1倍PB，比上市以嚟1.35倍平均值，仲係有折讓，更未有耐追到阿里水位。下周成績單公佈日，股價若果再質，到近2.8元橫行底，輕輕手兜一注。
錢雋
細價股專家
本欄逢周一、三、五刊出
錢雋
一周三件 - 錢雋 舊文
來源 source: http://hk.apple.nextmedia.com