生意難做等賣盤
2016年02月24日
匯控(005) 公佈令人失望的業績，但好彩佢派息保住，股價叫做企住無升跌。恒生銀行(011) 因為大派特息，股價上日跑贏阿媽，昨日回吐2.7%。
恒生銀行早前出售內地興業銀行，時間啱啱好，喺高位甩手後，大派高息酬謝股東，同時仲可以救埋
阿媽，由此可見本地銀行仲係生金蛋的鵝，有佢本身價值。
對於大笨象業績，高盛認為集團去年第四季稅前利潤僅19億美元，較預期的33.5億美元低，主要由於美元升值、季節性疲弱的環球市場業務、資產管理收入不佳及對沖會計處理均拖累營業額低於預期，同時就其涉足於能源業務而錄得較高撥備。惟根據管理層所言，匯控的資產質素並無實質惡化。
匯控要繼續賣產
高盛話，業績中唯一正面因素是每股派息符合預期，雖然是否能持續派息仍是未知之數。目前匯控有強健資本支持，核心一級資本比率按季改善10點子至11.9%。高盛維持匯控於確信買入名單，但目標價由77元，下調至70元。
匯控昨日無升跌，收報49.15元。而喺外圍股市飆升下港股本來高開，及後A股下跌，回吐0.8%收場，拖累港股由升轉跌，恒指收報19414，跌49點；國企指數收報8170點，下滑50點，成交587億元。大市沽空金額66億元，沽空比率11.25%，匯控排喺沽空榜首，金額達3.73億元，佔5.65%；恒生銀行沽空都有成2.9億元，佔4.39%
匯控、恒生兩母子，97前一個外闖、一個留港，結果證明到今日為止，都係留港有運行。去年匯控第四季見紅，市場擔心佢要減派息保留資本，結果佢加息留股東，好彩係佢有個乖仔，又有家用畀，叫做頂得吓數。業內估計，未來匯控會繼續靠出售資產填數，好多人都話，匯控如果唔係有香港匯控同恒生兩個乖仔，老早就流落街頭啦。
渣打勁蝕 倫敦急跌
環球銀行生意難做，渣打集團(2888) 又衰，去年虧損23.6億美元，2014年錄得盈利25.12億美元，蝕錢規模同賺錢差不多咁大。渣打確認先前宣佈不派發末期股息的決定。隻股在香港仲升1.8%，收市後公佈業績，在倫敦初段即跌3.6%。
銀行業績唔掂，裁員潮四起，最新係德意志銀行與瑞士信貸銀行周一開始對全球市場部門進行裁員，甚至內地銀行業都有挑戰。香港銀行業盈利已算係好好，但嚟緊呢一年就真係好多銀行家都唔知點睇。最近陸羽仁去酒會，好多「賓卡」都話至少上半年，個市都係要打守勢波，有人仲估低潮至少要捱多一、兩年，喺咁環境下，信貸需求疲弱，想借錢畀人你又未必敢借，只能步步為營。
本地銀行股禍福相倚
外圍雨勢漸漸影響本港，但本地銀行前景係咪咁差，有銀行家就話一半半，因為香港銀行營運同質素始終有番咁上下，故此仲係有好多內地財團有興趣收購，如果賣盤就點都唔止家的市價。呢排有股東嘈到拆天，叫東亞銀行賣盤，主席李國寶同兄弟李國章就增持。李氏兄弟增持好明顯係對銀行前景表示信心，話畀股東聽佢哋唔係咁容易棄守，同一時間，若然東亞真係賣盤，相信股價實會撩起，所以佢哋嘅增持行動，係進可攻、退可守。
從經營角度睇，本地銀行做生意愈來愈難，對股價係負面因素，但當生意難做到咁上下，可能又會觸發股權變動，一旦賣盤，股價又能爆升，形成一個禍福相倚的格局。喺呢種情況下，本地銀行股唔可以高追，只可以低吸，短線博反彈，長線博賣盤，係未來一年半載且戰且走的實用戰術之一。
陸羽仁
金融High Tea 舊文
來源 source: http://hdfin.stheadline.com