智取大市：當AlphaGo識炒股
■AI炒股已經發展多年，海外有唔少標榜AI嘅對沖基金。 資料圖片
AlphaGo以4：1擊敗南韓棋王李世乭，證明AI已經能夠喺棋局複雜、人性化嘅圍棋之上，擊倒人類，係一大進步，究竟幾時喺股市方面，令投資者冇鞋挽屐走？AI炒股已經發展多年，海外有唔少標
榜AI嘅對沖基金，目前亦有德國公司正在開發AI炒股App，聲稱成功預知股價走勢嘅或然率高達75%至95%，得唔得當然要佢落場先知。
睇趨勢、技術分析，睇埋盤路，人工智能炒股未必比捉圍棋複雜幾多。至於人腦同細菌一樣，炒股方式不斷變種，由早年著重基本因素去到近年狗衝就贏，其實不是一種進步，而係人類行為改變，所以小弟相信電腦進步速度將會快過人腦。長遠嚟講，AI程式只會對於短線客構成越嚟越大嘅威脅，只不過，完勝短線客嘅時間，係5年、7年後定10年後，冇人知，外行人無謂去估，知道有呢種威脅存在便行。
AI加入戰團，亦令相反理論更難捉摸，因為唔只估人，仲要估埋電腦。與其逼自己短炒技術進步得更快，迎接未來電腦嘅挑戰，返樸歸真做番中長線配置似乎更實際，長線投資或許變番大趨勢。講就輕鬆，最好仍然係尋求各方面進步，因為投資根本冇得懶。近期強調揀好股等機會上車，今日唔夠篇幅去延續嘉里物流（636）嘅故仔，分析惟有順延，舜宇（2382）同信義玻璃（868）亦係候低吸之選。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com