無數計仲好炒
2016年03月11日
內地股市喺缺乏新資金入市下尾市飛墜，上證全日大跌2%收市，搞到港股高開低走，未能企穩兩萬點大關，收市轉跌11點，全日成交縮至僅多於500億元，為今年以來最奀。
成交奀無力上
恒指高開，升幅一度擴大至188點，高見20184點，但內地股市向
下，搞到港股在兩萬大關失守。恒指收報19984點，跌11點；國指收報8420點，下滑21點，成交金額只有542億元。內地血漿製品供應商興科蓉醫藥(6833) 首掛，全日收報0.8元，與發售價0.8元相若。
亞洲電視五行欠水，入咗深切治療部，醫生建議拔喉，睇怕就咁玩完，彌留之際突然有上市公司話願意泵水打救，仲掀起一陣電視股炒作潮。有線寬頻(1097) 股價爆升，為升幅最大個股，收造0.6元，大升20%，香港電視(1137) 第二度提出申請免費電視牌，股價揚3%，報1.71元；電訊盈科(008) 升1%，報4.82元；電視廣播(511) 就跌2%，報30.45元。有中環茶友話，香港電視惡做，本地人都知，只係內地人眼中媒體仲係有價資產，所以亞視死到臨頭，仲有人意圖救活搞概念，估計係睇住佢個廣東落地權呢個狀況就好似西諺所講，某人的毒藥，係另一個人的美食。
電視股忽然出現炒作，為首係有線寬頻借住話免費電視牌照出籠在望炒作一番，收市佢升20%若我有股就會沽喇。
另外，提出借錢俾亞視的協盛協豐(707) 都不甘寂寞。有人唔明，香港市場只有七百萬人，內地又唔可以直接入去玩，係人都知難玩，所以無論有線，都計唔明條數點有得炒作？
虧蝕電視股炒得癲
電視股炒作條數難計，但茶友話正係條數難計先有得炒，因為正正經經做生意，係人都知電視競爭大，好似無綫就快公佈業績，聽講大家都預咗條數惡睇，估計純利倒退唔少。相反，如果公司唔賺錢，咁大家就無市盈率計，咁就大家炒概念，玩吓「扑傻瓜」遊戲，呢類遊戲要贏，最緊要就係要鬥醒目先落車。
以有線為例，集團2015年虧損較去年同期1.39億元擴大至2.33億元。每股基本虧損0.1159元。要留意係期內，營業額下跌9.4%至15.1億元，毛利率減少3.8%至34.7%。有線如果開埋免費電視，就要喺製作上投入資源，希望收到好多廣告才能夠抵銷成本，咁先對業績改善有幫助。如果有線將部份現有資源好似新聞等作免費播放，就要考慮收費客戶流失的問題，因為現時公司收入仲有15億元，如果收益下跌，好直接就會令虧損擴大，所以免費電視牌照增加，收費電視如果無獨特內容，未來客量同廣告有可能進一步流失，所以免費電視開台，對佢最多都係好壞參半，佢股價喺消息後爆上，主要係市值一度跌到10億元之下，咁咪炒資產同殼價囉。
至於另一隻話借錢俾亞視的協盛協豐，外人看來更覺離奇。因為亞視連個牌都無埋，仲點解要泵水去搞，只能話香港人覺得食之無味的雞肋，可能係其他人覺得有辦法加啲色水落去，變成上菜啦。
喺有份搞電視的公司中，電盈(008) 基本業務最穩陣。野村發表報告，讚八號仔屬下的香港電訊(6823) ，原因是除業務多元化覆蓋流動通訊及固網業務外，收入相當穩定，加上100%的派息率，現價折合預期今明兩年股息率5至6%，因此首予「買入」評級，目標價13元。不過，佢咁講其實令人覺得都係做電訊商好過做電視囉。
陸羽仁
金融High Tea 舊文
來源 source: http://hdfin.stheadline.com