脫 鈎
2016年03月09日
美股受油價回升帶動再升，但港股卻受到中國出口顯著回落拖住後腿，無法跟升。呢排港美股市不時分道揚鑣，甚有decoupling(脫鈎)味道。
中美股市「分途廣播」
美股經過年初震盪，三月份升吓升吓，杜指唔經唔覺上番萬七點樓上，幾乎無跌過。港股就由去年
中兩萬八千點高位下插，家剛彈番上兩萬點，已經有氣喘跡象，可見過去大半年，港美兩地股市「分途廣播」。
港股傳統上跟美股走，除咗美股係全球股市大佬外，仲有兩大基本因素，一係中美貿易關係極為密切；二係八十年代香港實施聯繫匯率後，香港放棄利率自主權，變相把貨幣管理權委託咗畀美國聯儲局。
隨着時間發展，港美貿易關係被中國取代，形成實體經濟跟內地，息口政策跟美國，慢慢就出現兩者互不協調的狀態，好似家本地經濟跟住內地走弱，但貨幣政策就跟住美國走強，喺咁情況下，經濟唔好但匯價貴，資產價格只有加倍向下調整，去適應番個制度，即係話，美國加息對香港資產如股票同樓市帶來的衝擊，會遠超美股同美國物業，這亦解釋咗點解美國收緊銀根，港股同港樓受壓會勁過美國。從呢個角度睇，港美股市decoupling好可能仲未完結，港股落後美股情況有可能擴大，直至美國息口見頂為止。
內地經濟差，一個例子係上月出口勁差，不過數字公佈後A股卻離奇暴瀉逾3%後拗腰回升，令港股昨早曾大跌257點，午後收復部分失地，恒指收報20011點，跌148點；國企指數收報8505點，下滑121點，成交金額由昨日的749億元，縮減至626億元。
大家要留意，兩會開緊，阿爺有維穩股市的需要，想搞得好睇啲。你睇內地上證綜指微升0.1%，但工商銀行A股這隻巨無霸卻升0.9%，有少少托住大股的味道。
今次中國出口數字驚嚇，以美元計2月內地出口下跌25.4%，跌幅近七年最大，進口則下跌13.8%，貿易盈餘為325.9億美元。恒生銀行高級經濟師姚少華就估計，隨着春節效應消退，預期3月份內地出口或觸底回升。
港股先跌後回穩，股價普遍變動唔大。有話題性的是擁有《葉問3》部份收益股的十方(1831) 就連續兩日下插。《葉問3》本月4日於內地首映，上映89個小時票房已突破5億，同時被指多家影城出現零點場滿場、工作日非黃金時段影票售罄及超過票價等異常情況，引發買票房質疑。
《葉問3》票房疑雲搞死十方
《葉問3》上映第二天，「電影票房」等微博帳戶質疑存在大量買票房行為，還貼出可疑現象作為證據。電影局表明關注，近日部分影片和影院出現虛假排片、票房注水現象，現正對相關情況進行排查。喺消息傳出後，十方股價再跌，收報2.12元，大插28.6%，收2.12元，插到相當恐怖吓，今次事件唔知點收科。
最新公佈業績的公司衰多過好，但亦有強勁增長的少數份子。主業做紗線的天虹紡織(2678) 公佈，去年純利5.91億元人民幣，按年增長93%，每股盈利67分，擬派末期息12港仙。公司股價午後走高，新報5.93元，升5.9%。天虹主業生產包括紗線、坯布及面料的銷售。公司指2013年於中國和越南新增的產能，在2014年全年高效運轉，令公司進入高增長期。
天虹去年股價最高11.14元，現價5.93元市盈率7.4倍，佢喺行業有領導地位，加上越南產品出口美國享有一定着數，可以享有一定溢價，但短期升得急咗，可以等佢回調吸納。
陸羽仁
金融High Tea 舊文
來源 source: http://hdfin.stheadline.com