財女手筆 - Melody 2016年3月23日
財女手筆：樓價影響生仔定女
■香港樓價貴絕全球，現時樓價已經係港人年入息中位數19倍。 資料圖片
樓價高到低有幾影響香港一班後生仔？當你以為，結咗婚仍然要分開住，唔去日本旅行、唔睇戲、唔出街，死慳死抵為層樓，已經夠慘喇啩？傻啦你，天價樓價唔止影響後生仔婚後生活，同時仲影響佢哋生仔定生女！
唔係啩，樓價仲神奇過DNA？其實，以前就有調查講過，係樓價越高嘅地方，生女嘅父母會更加幸福，點解？並唔係因為男仔細個無得停、好活躍……而係因為生仔將來就要為個仔準備一層樓！否則上車困難，會增加順利結婚嘅難度，婚後分居或演變成直接分居，離婚！
香港樓價貴絕全球，現時樓價已經係港人每年入息中位數19倍，養一個小朋友要付出的代價，可能真係唔止400萬或者通脹後的800萬？
原來，仲要加一層樓的成本，喺香港地，唔怪得人哋會叫你個女做「千金」，原來生女真係為父母慳番唔少「金」，喺樓價高企下，生仔只怕會更苦惱！
結婚、生小朋友，都係人生幸福嘅里程碑，但係被樓價搞得一塌糊塗，婚後分居相信只係開始，曹Sir在世時一句名言：「別讓500呎綁住你的青春」，計我話，更加唔好為高樓價放棄你自己的一生！因為樓價始終都會跌，馬照跑，婚照結，仔女照生！
Melody
本欄逢周三刊出
Melody
財女手筆 - Melody 舊文
來源 source: http://hk.apple.nextmedia.com