財經評論：男女生的浪漫
■一隻PS4遊戲，價錢三字頭，但每日旺角信和中心同好景商場都有唔少機迷爭住進貢。 彭博資訊
呢排身邊不論男女，都經常沒精打采，無他嘅，男嘅，就成班晚晚飛美國；女嘅，就近啲，飛韓國。
講緊嘅，就係以美國曼克頓淪陷作為背景的新遊戲《Tom Clancy"s The Divi
sion》（中文譯名:全境封鎖）；同埋由「雙宋」宋仲基、宋慧喬兩名韓國紅星主演的人氣韓劇《太陽的後裔》。兩者都係以戰爭作為故事背景，分別係近期唔少男人堆同女人堆嘅共同話題。男士打到天光，女士煲到日出。
其實呢兩種娛樂近期熱爆，多少反映出男女娛樂消費心態大不同。先講隻男人game，Division3月8日面世，PS4初初推出香港下載版折實價約340元，實體普通版光碟定價大約400元，網上有人一度炒到近500元都見過，特別版連精品肯定要四位數，不過近期供應量多番，價錢就回歸理性，但最平都仲要三字頭。
至於韓劇《太陽的後裔》，是新電視台ViuTV免費睇到，甚至只需手機裝個app，或者開著部電腦，都可免費睇。更瘋狂嘅，用自己方式，用電視軟件瘋狂煲，甚至煲完再煲。
打機，從來都係男人間嘅浪漫，追求嘅態度甚至可以用奢侈來形容，基本上，一隻PS4遊戲，價錢三字頭係市價，但每日旺角信和中心同好景商場都有唔少機迷爭住進貢。
煲劇，其實只是女人用來「攝」時間一種活動，試想像下，如果要畀錢，用一隻PS4遊戲價錢去買《太陽的後裔》全集，幾可肯定，放棄睇嘅女觀眾，應該係現時過半數，最少。
相反，如果Division免費推出市場任download，男士們隨即會質疑隻game係咪流流哋，唔好玩，就算download完，都一定唔會晚晚瘋狂搵朋友組隊打餐飽。
所以，一隻game同一套劇，可以反映出，男人，只要係自己喜歡嘅，貴一貴都會買；女人，點喜歡都假，最緊要係免費。
記者：黃嘉銘
財經評論 舊文
來源 source: http://hk.apple.nextmedia.com