中環在線 - 李華華 2016年4月22日
中環在線：運動器材店未上市先盈警
燈神Lulu幫倒忙？
新股概念越來越有趣，保濟丸（雅各臣科研製藥）上市，連賣運動器材嘅Fitboxx都上市，仲肯定係一隻誠實嘅股份。事關佢母公司偉博控股，未上市就已經先發盈警，喺招股書中向投資者預告，今年可能會因為上市所需的一次性開支，而導致純利大跌。認真唔話得。
偉博2007年喺元朗開第一間Fitboxx零售店，之後繼續擴展到家陣有7間「Fitboxx元氣館」。原本賣開踏步機、摺合式跑步機、瑜伽用品、脂肪磅等等。2010年開始做埋美容儀器、激光活髮器。公司一般係向品牌或專利擁有人買產品，再轉手賣畀客戶。
Fitboxx上創業板
偉博喺招股書風險披露一欄中，都戴番個頭盔，披露佔公司22.3%採購額嘅兩大供應商，生產基地設於以色列，當地政局不穩會影響業務。除此之外，連2014年底發生嘅佔領行動都畀公司攞出嚟翻炒，話如果再有類似情況出現嘅話，又會影響生意喎。
咁坦白，唔怕冇人認購咩？唔好意思，偉博好似最近隻翠如BB股咁，上創業板嘅，可以唔受散客玩，盈警又乜好怕喎！
不過都提一提勇於向高難度挑戰、鍾意跟風炒創業板新股的朋友一句，Fitboxx有部iRunner部屋跑步機，係由名不虛傳嘅「燈神」大埔Lulu代言嘅。唔知偉博上市，會唔會冧莊搵番大埔Lulu敲鑼呢？華華總結嚇Lulu戰績，畀大家參考嚇（見表）。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com