Money Walker：內地增長5%都冇？
喺中國又行返依靠舊經濟行業推動全國增長嘅舊路之下，一項反映內地經濟實況嘅指標又再次用得著。
講緊嘅係銅價，事關銅價走勢同內地GDP增長變化好相近，原因係中國係銅嘅重要買家，全球有差唔多一半嘅銅都俾中國買咗。中國經濟向好，
要起多啲基建同房屋，銅嘅需求自然亦越大，銅價就自然越有支持，所以銅價同中國GDP嘅變化，一直以嚟都好接近。
巴克萊商品策略師Kevin Norrish更加提出一個講法，就係內地真正嘅GDP增長，相當於倫敦金屬交易所3個月期銅價格除以1000。好簡單，即係如果銅價係5,000美元一噸，就暗示內地GDP真正增長大約係5%；銅價處於7,000美元一噸，即代表內地真正GDP增長有7%。
咁𠵱家嘅國際銅價係幾多？答案係4,900美元左右，所以根據Norrish條算式，內地真正GDP增長應該只係得4.9%，遠低於早前官方公佈嘅首季6.7%增長。
銅價反映經濟實況
講真，係人都知大陸GDP數據有水份，只係多與少嘅問題。上述用3個月期銅價格除以1,000嘅算式，當然唔可以認真作為計算內地GDP嘅依據，但仍可粗糙地以此推敲中國經濟數據到底參有幾多水份。另外，GDP數據唔多唔少都有啲滯後，唔似得銅價咁快反映經濟實況，所以銅價升跌點都有啲參考價值。
調返轉頭講，由於銅價冇得造假，所以喺銅價並未呈現一個見底回升嘅趨勢前，大家根本毋須對中國經濟數據出現好轉太過興奮，亦唔應該就此相信環球風險資產最壞時間已過。
El.
本欄逢周二、五刊出
El.
Money Walker - El. 舊文
來源 source: http://hk.apple.nextmedia.com