金手指：藍絲好過之鋒
■黃之鋒日前去滙豐銀行申請聯名戶口但被拒開戶。 資料圖片
學民思潮摺咗，話轉搞政黨，黃之鋒同佢拍檔周庭就喺長假期時，話日前去滙豐銀行（005）申請聯名戶口，收集公眾捐款做新政黨經費，但被拒開戶。
大家可能會話：「政治打壓！」孫柏文都有咁嘅感覺。但如果你講完上述嗰句
後，畫蛇添足咁話：「怕中共啦！」咁我就唔同意。
大約幾年前，我幫襯開嘅實貨白銀經紀，即奮勇抵抗紙幣狂魔嘅白銀戰隊軍備商，喺創辦人離世後，決定自立門戶。佢中學、大學都喺英國留學，由細個開始喺滙豐開戶口，到英國幫襯米特蘭銀行，連出來做嘢後個出糧戶口通通都係HSBC。如果睇錢嘅流向就會認識一個人，相信佢對滙豐嘅認識比地球上任何人更佳。
點知，當佢真係攞齊商業登記等文件後，滙豐拒絕佢開戶申請。論下場，賣金賣銀，都係黃之鋒。仲要黃之鋒都係幫襯滙豐幾年，我個經紀係以十年計呀！
再講，我喺Facebook有唔少創業圈嘅朋友。早排有個話，創業冇錯喺香港好簡單，政府要你攞嘅商業登記證好快好平。不過樽頸唔係喺政府，而係喺銀行。因攞完商業登記證後，就係搞銀行戶口，點知銀行話冇正規商業地址唔開得，不過你連戶口都冇點租呢？
我講畀你同曾俊華司長知，香港啲銀行已經黐曬線。佢哋確實係受政治打壓下完全淆底。不過受嘅係由美帝為首，特區政府填鴨式財金公務員全力協助嘅打壓。
香港已不能創業，連賣實銀嘅嗰位經紀最後都要用澳門嘅銀行系統，呢個話到明用自己名幫政黨「launder錢」嘅黃之鋒開唔到戶口，同一個話用自己私家車做Uber跟住買唔到「三保」嘅人有乜分別？
黃之鋒話唔會幫襯大陸啲銀行，呢個就可惜，因為以大陸銀行一向幫啲貪官「launder錢」嘅經驗，確實要繞過啲填鴨式監管最好都係搵佢哋。所以今次，真係愛國有理，做藍絲好過黃之鋒！
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com