Money Walker：美元牛市玩多一年？
環球市場勁關心美元呢輪牛市結束未，因為喺美金走強嘅時期，包括中港在內嘅新興市場通常都冇乜好表現，所以越快結束對大家就越有利。
睇番過去40年，美元其實只係經歷過三輪大牛市，第一輪係1980年代初，第二輪係1995至2002
年，第三輪就已經要數到2011年中到家陣。
彭博統計咗過往兩輪美元大牛市維持嘅時間有幾耐，發覺分別維持咗67個月同81個月。
至於今輪的美元牛市，暫時只得57個月時間，長度未及前兩輪牛市，彭博因而認為，今輪大牛市應該仲可以玩多一年。
筆者認為單單因為以前嘅美元大牛市每輪前前後後都超過5年，就斷定今次呢輪美元大牛市都一定要超過5年先劃上句號，聽落好似兒戲咗啲，之但係筆者嘗試從技術分析同基本分析去睇，又覺得彭博嘅預測未必錯。
技術分析上，美滙指數嘅超長期季線圖（見圖）顯示，美元似乎做緊雙頂型態，但仲爭緊個後抽，先完成一個完整嘅雙頂形態，相信呢個後抽如果真係出現，亦需要多幾季時間先會完成。換言之，從技術分析上睇，美元喺今輪大牛市之中可能已經見咗頂，但未來一年可能仲會喺現時嘅高位附近徘徊。
如果從另一角度——基本因素，亦即從美國加息預期方面去分析，美元再升多一年嘅講法亦都合理，原因係聯儲局仍然未放棄加息念頭，預期今年全年仍會加息兩次。
只要市場預期今輪加息周期未到尾聲，美元就算唔再升，都會繼續喺高位徘徊，直至加息預期消散為止。
El.
本欄逢周二、五刊出
El.
Money Walker - El. 舊文
來源 source: http://hk.apple.nextmedia.com