Money Walker：熊市一歲大喇
最近幾個月舊經濟股同價殘股都見翻生，今年初金融市場嘅憂慮亦煙消雲散，「熊市」呢兩隻字近期亦絕跡於耳。
喺美元走弱、大陸經濟回穩同埋油價反彈下，市場憧憬美股幾時可以破頂，亦睇緊港股係咪就快突破二萬二千關，反映大家對經濟嘅憂慮大為降
溫，似乎忘記咗自己其實仍然身在熊市。
舊經濟難解長窘
熊市時股市嘅大趨勢雖然係向下，但期間都一樣會有反彈，只係所維持嘅時間會比較短暫。所以散戶於熊市時追入買升絕冇問題，但喺呢啲市況下落注從來只宜短線，兼且要就隨時出現跌市做好對沖。
近期環球經濟回穩，好大程度係由於大陸無計可施下又再度行返舊經濟條路，重新依賴放水、內房同基建等谷起經濟。
問題在於，咁樣做只會造成滯脹同加劇產能過剩，因此舊經濟呢條路根本唔行得幾耐，呢段經濟蜜月期遲早會玩完。換言之，舊經濟股同價殘股冇可能長期受惠，呢兩個月嘅好轉只不過係熊市下嘅短線反彈。
有人話後金融海嘯時代，股市已經變得牛熊難辨，不牛不熊，因為股市一有頭暈身㷫，央行就會出手幫拖，令到牛市維持時間延長，熊市維持時間縮短。不過筆者相信，央行就算再法力無邊，都無法完全阻止熊市出現。
去年上半年環球股市紛紛破頂，無可否認係牛去熊至嘅典型訊號，更何況央行已經越來越冇計，日本央行就係最佳例子。港股大時代於4月初滿一周年，意味今趟熊市剛滿一周歲。筆者在此祝願呢隻熊快高長大，快快老去。
El.
本欄逢周二、五刊出
http://facebook.com/moneywalkerhk
El.
Money Walker - El. 舊文
來源 source: http://hk.apple.nextmedia.com