大棋局 - Mr. Tregunter 2016年5月3日
大棋局：央行不能說的秘密
30年代美國一條麵包9美仙，70年代25美仙，𠵱家差唔多2美元。如果30年代時全副身家得9萬美元，一路錢搵錢到𠵱家賺到200萬美元，其實幾乎冇鬱過，但會感覺良好，覺得自己財富增值。若當日身家9萬美元，今日滾存成100萬美元，覺得自己財富增值就儍。
近年各國央行都喺到疾呼「通脹目標」，三日唔埋就話有好多提振經濟嘅招數排住隊等出，但搞嚟搞去經濟仍然暮氣沉沉。央行咁關心通脹嘅目的只有一個，就係走數。通脹係央行走數嘅最好方法，冇通脹，我哋現時嘅貨幣系統就玩唔到落去。
暗地裏溝淡債務
過去嘅貨幣係實物、硬通貨，由貝殼、到銅錢、到白銀、到黃金，該實物越稀有，其儲藏價值越高，越適合作為貨幣。但貨幣學派話畀我哋聽，用稀有實物作為貨幣，當經濟活動增加，貨幣增量追唔上經濟增長就會通縮，將經濟拖落嚟。於是我哋越來越相信黃金白銀唔可以再作為貨幣，in god we trust，重點在最後一個字，信，廁紙都可以當1,000蚊。
但就算盲嘅冇偷睇國家機密都知道，70年代美元同黃金脫鈎後，全球央行債務瘋狂飆升，再加埋2008年後QE，已經積重難返，冇人諗住還。咁點搞？最好就係銀紙後面印多個零，債務就少九成。打劫都係一門藝術，要講節奏，太猴擒會落得威瑪共和國或者津巴布韋下場。每年3%、4%通脹，長做，透過複利率陰陰地溝淡債務，平民百姓未至於反抗，又要忙住跑數唔得閒理咁多嘢，玩嚇手跑贏通脹財富增值或以為自己財富增值，大家開心。
所以共產黨老祖列寧早已看透世事，佢昂首望夕陽伸出有力的左臂：「顛覆資本主義制度最好嘅辦法就係令貨幣貶值，通過連續嘅通貨膨脹，政府可以靜靜雞咁沒收百姓嘅財富，加劇貧富懸殊……一百萬個人入面亦唔見得有一個人睇到蠱惑所在。」
人嘅天性係只接受增加，唔接受減少，加人工有通脹，感覺好過唔加人工冇通脹。現時各國央行最頭痕係貨幣流速不斷跌（見圖），即錢嘅流轉速度越來越慢。用負利率希望將死水變活水，但負利率若擴大到針對普通存戶，又會引發貨幣乘數下跌問題，等於摑番自己一巴，唔知我哋有冇幸見到呢套嘢玩到爆嘅一日？
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com