摩笛吹高地產股
2016年07月19日
全球加息步伐放緩，資金重新部署，喺脫歐驚魂甫定後，市場估計央行行長個個爭做鬆弛熊，部份熱錢流入股市，樓市同樣受惠，有回暖跡象，過去本地新盤去貨加快，毗鄰嘅深圳仲出現新盤開售兩小時被搶光嘅境況。
全球央行做鬆弛熊
英國央行上星期無減息，唔多唔少有夾夾看淡炒家的味道，英鎊隨之回勇。但大鱷想食大茶飯，認定央行行長底牌都係鬆過鬆弛熊，估計唔會就咁被擊退，短期嘅平倉，可能只係為造更大嘅空倉作準備。至於內地央行繼續放水，對14間金融機構進行MLF放水操作，涉資2270億元。
投資界對息口前景轉淡，家全球主要經濟體以美國最有本錢加息，起碼最新公佈嘅數字，美國仲係似模似樣。但美國作為西方最強經濟體，加息步伐都有可能放緩，據摩根士丹利分析師最近估計，發達市場今年增長將由2015年的1.9%放緩至1.4%，明年再進一步減慢至1.2%。
鑑於增長率料低於普遍預期，導致央行需更長時間採取寬鬆政策，當中預計英國央行2016年第三季度料降息0.4厘，並在秋季實施更多定量寬鬆政策，加拿大2016年第四季度料降息0.25厘。該行又估計，聯儲局在明年底前不會加息。
鷹君沽美國大樓勁升
摩笛咁樣吹一吹，地產股就吹起咗，長實地產(1113) 、恒基地產(012) 再升1.3%；新地(016) 、太古地產(1972) 漲逾2%；信和置業(083) 升2.6%，報13.66元，仲創咗新今年高位。之前一直落後嘅新世界發展(017) 升2.2%，報8.53元。
講到勁，就要數鷹君(041) ，股價收報37.1元，勁升近一成。美息乏力，當地樓市就有勁，喺市道好轉下，佢旗下持股49.97%附屬美國房地產基金Pacific Eagle，就宣佈以2.55億美元(約19.81億港元)出售三藩市一幢樓高28層辦公大樓，料可分派合共5986萬美元(約4.65億港元)，預計將獲得純利1867萬美元作為核心盈利。
陸羽仁最近有朋友由三藩市返港，傾起當地樓市暢旺程度比香港有過之而無不及。三藩市以前叫舊金山，但現在變成受新經濟帶動最多的大城市之一，當地大廈新樓動輒賣過千萬港元，搞到友人都想賣樓退休去也。鷹君旗下房託沽樓套現，以集團派特息成性嘅作風，大家又估佢有錢分，於是股價一擁而上，竟然一度打入二十大升幅，喺中型地產股嚟講都算少見。
熱錢吹大樓泡，較弱的本地樓市都有少少起色，過去兩日新盤暢銷，唔係經常有盤開嘅百利保(617) 食正呢個窗口賣樓，結果銷情不俗。
而近年集中火力專做深圳樓盤嘅龍光地產(3380) 於剛開售深圳東的旗艦項目龍光城共推售644個單位，僅兩小時即全數售罄，銷售額達10.8億元人民幣。龍光買地非常勇，經常以地王價投地，由於佢土地成本貴，若然看好深圳房地產，可以考慮其他深圳嘅地膽房產股。
新地沽空居首位
喺資金追逐資產股下，恒指收報21803點，漲143點，其間仲升過去今年高位；國企指數收報9090點，上揚41點，成交只555億元。港燈(2638) 再創上市新高，最高見過7.95元，揚4.61%，收7.92元，升4.2%，全日成交555.45億元，全日沽空金額63.15億元，沽空比率11.37%，其中新地沽空3.14億元，佔近5%，可見市況爭持開始激烈，雖然摩笛大吹，但另一方面獲利回吐力量正喺度累積緊。
近日資金追捧收益穩定嘅股份，港鐵(066) 上星期已創新高，昨日唞氣回跌0.36%，收報41.95元。外電報道，主權基金淡馬錫，考慮將新加坡地鐵公司(SMRT)私有化，淡馬錫控股持有新加坡地鐵公司54%的股權，折合市值17億美元。據年報介紹，新加坡地鐵公司於1987年成立，在2000年7月在新加坡交易所掛牌，業務包括當地地鐵營運外，還包括巴士、的士、工程服務及零售與廣告業務，新加坡主權基金咁搞法，會唔會有人要求特區政府都有樣學樣呢？不過政府想維持對港鐵控制權，都唔係咁易全面私有化。
陸羽仁
金融High Tea 舊文
來源 source: http://hdfin.stheadline.com