操盤手劄記：
聯塑食正內地需求
■內地城市著眼改善雨水消納系統，聯塑勢可受惠；圖為集團主席黃聯禧。 資料圖片
今日買定花生，等睇超人！長和（001）中期業績係次要，主要係睇超人有咩蹺拆掂英國脫歐、英鎊貶值為公司帶來嘅風險！講到業績，本周有7隻藍籌放榜，共佔恒指權重近兩成！前日係港
鐵（066），昨日係港交所（388）、九倉（004），三者都乏善足陳，今日輪到中移動（941）、長和、長實地產（1113），明日就到金沙（1928），希望有驚喜啦！
港股周一挾淡倉大升；周二好友唞氣微跌；昨日則微升，收22492點。萬眾期待嘅黃金交叉，昨日只見50日線與250日線kiss，然後市場繼續等消息、等業績，悶局！近日成交都係500億、600億元，資金只能輪流炒，繼高息股後，現時傾向追落後。恒指喺8個月高位22500附近橫行第三日，或需時整固，才再試23000關。市傳索羅斯喺香港招兵買馬，打算沽空港股，亦影響投資氣氛。
自從6月底長江流域暴雨成災，我一路都有留意海綿城市概念股，聯塑（2128）係其一。水災暴露內地城市排水能力弱嘅問題，而聯塑係中國最大嘅塑料管道及管件生產商，內地巿場佔有率達兩成，產品應用於通訊、供電、供氣、供水、排水、排汙等，內地城市著眼改善雨水消納系統，聯塑勢可受惠。
公司舊年將塑料管道應用擴至深海養殖網箱，呢瓣有望成為新增長引擎，而且因有利環保，獲政府補貼。另外，又開發門窗系統、水暖衞浴及整體廚房等家居產品，食正房地產市場回暖勢頭，並已夥拍惠而浦組建新品牌——領尚．惠而浦，主打整體廚房。公司亦繼續發展電商平台聯塑商城，發掘商機。
聯塑股價5月至7月中於4元附近整固，之後以大成交突破橫行區頂部，7月尾於4.65元遇阻而回。近日發力，呈杯柄突破。現價4.51元，相當於2016年預測市盈率5倍，較同業平均25.6倍估值大幅折讓，估值有望重估，可於4.5元附近吸納，先睇5元，穿4元止蝕。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com