財金冒險號 - 笑笑生 2016年8月11日
財金冒險號：
滯脹陰霾籠罩全球
■格林斯潘最近表示擔心美國會出現滯脹。 資料圖片
聯儲局前主席格林斯潘最近話，擔心美國會滯脹（stagflation）。格老於貨幣政策上縱有諸般不是，眼光尚算厲害。佢喺2007年12月就話，美國有滯脹的初期徵狀，結果之後半年，油價高見147美元，確係造成滯脹。
香港人受過1998年至2003年嘅通縮之苦，滯脹就要追溯到四十幾年前石油危機，我哋呢代人有機會試嚇喇。滯脹中嘅「滯」，香港無疑已身在其中，首季GDP增長0.8%，較一年前2.4%明顯放緩。零售及旅遊業未見底；金融業則外強中乾，恒指乾升，業界裁員，經濟只會繼續停滯。
「脹」方面，最新6月份通脹只得2.4%，較一年前3.1%低咗，但跌幅無GDP咁大，而且最近樓價又反彈，最低工資有加冇減，物價好難跌。換個角度，唔睇數據，問嚇自己，你人工加得快啲定車費、快餐加得快啲？覺唔覺份糧越來越唔見使？咁就知係咪已經滯脹。
如果格老又一次講中，債市就大大鑊。全球資金幾乎不問價買歐美日國債，搞到日本、德國等國債負孳息，一旦通脹升，呢堆國債嘅實質孳息率（real yield）就負得更離譜。到時資金唯有撤退，人踩人令債價跌、債息升，同時通脹將令央行綁手綁腳，唔可以再靠減息兼QE救市，全球市場以至本港樓市勢將受重創。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com