炒業績要用水晶球
2016年08月11日
美股雖再創新高，但單日走勢有啲反覆，港股高開，亦出現畏高情緒，指數午後由高位回落，一輪浮沉，終於微升收市。港股上升，恒指收報22492點，升26點；國企指數收報9315點，升14點，成交金額612億。
美股係咁升，有「末日博士」之稱嘅麥嘉
華就估計，將會出現一個極度痛苦嘅跌市，程度可以同史上最慘烈嘅股災相比，五年升幅可以好快無晒，佢嘅理由係O依家嘅升勢唔係由基本因素支持，而係靠公司回購、收購合併推動，呢啲人為因素不可持續。唱淡係末日博士嘅慣技，佢都知股市不合理就會跌，但幾時跌就無人知，佢咁講嘅最大意義，就係O依家股市已經脫離業績支撐，跌起上嚟幅度可以較大。
港交所純利如預期下跌
美股再升，唔多唔少推動到港股，分別係美國喺浪頭，香港喺浪尾，造成兩者差別的原因在於美國經濟強啲、企業派出來的成績好啲。香港則主要炒水多，大家無乜嘢好投資，所以搵啲嘢炒吓，喺呢種心態下，有機會就會食胡，汽車股呢兩日開始回落，顯然就係低位買左貨嘅股民，開始出吓貨，大家只係玩換馬，唔係有新資金入市。
投資者咁審慎，主要係中港兩地經濟仲係弱，而且未知幾時見底，公司盈利無乜增長。最近公佈嘅大藍籌業績好多都錄得倒退，前日港鐵公司(066) 公佈業績向後行，跟住港交所(388) 公佈6月30日止中期業績，純利29.85億元，同比跌27.1%，基本每股盈利2.47元，派息2.21元。
港交所業績倒退已經預左，因為去年上半年有A股牛市刺激，今年就靜左好多。港交所上半年收入及其他收益為56.3億元，同比跌18%。港交所指，影響收入的主要因素為香港的現貨市場及倫敦LME的商品交易均見交投放緩；不過管理層就透露，期交所2016年上半年的衍生產品合約成交上升，創出半年度最高紀錄。
對本地主要藍籌業績唔應該寄以厚望，其實已經係大行共識，好似港鐵業績倒退，摩根士丹利發表報告就話仲符合預期，每股資產淨值由36.3元上調至43.3元。不過同時亦話明，佢經營環境面臨更多挑戰，因本地鐵路收入和租金收入增長放緩，成本通脹及新線路開通令毛利受壓，加上股價對資產淨沒折讓及股息率只有2.5%，評級由「與大市同步」下調至「減持」。
早排港鐵炒上一個特別藉口係佢派特別息，大摩特別指出，如果不計特別息，港鐵股息率只有2.5%，較其他收息股及地產發展商低。預期港鐵不會增加派息，因為現時派息比率已高達經常性利潤的70%，而且槓桿比率在派特別息後高達26%。預期經常性利潤今明兩年增長放緩至4%，遠低於今年上半年的7.8%，學似陸羽仁講，大摩可能覺得佢已透支左好多升幅，所以要將佢降級。
彩集盈警唔使太驚
其實炒業績唔可以等佢見光，必須用水晶球，事前自己估吓，然後睇股價有無反映。陸羽仁留意到，彩星集團(635) 系齊發盈警，彩星集團預期截至6月底止中期業績將出現虧損，去年同期則賺3.03億元。公司解釋稱，虧損主因期內投資物業的重估虧蝕約2.12億元、旗下彩星玩具(869) 收入及溢利下調，以及市場競爭激烈導致銷售額下跌及營運開支上升。彩星玩具亦發盈警，預料截至6月底止中期業績，純利將由去年同期的1.56億元，倒退至9000萬至9800萬元間；收入由6.88億元跌至約5.95億元。
彩星玩具主要係產銷忍者龜玩具系列，早排呢個系列有新戲上演，股價先行炒上，但電影票房麻麻，股價在電影上畫已經插定先，所以某程度股價已經反映左。至於佢阿媽彩星集團除左做玩具，仲有優質物業收租，彩星集團喺盈警下跌左4%，收9.47元，O依家佢資產28元，息率近3厘，如果真係要買股收息，咁不如吼呢啲壞消息，等佢跌近9元低吸博反彈，博唔到都可穩陣收息。
陸羽仁
金融High Tea 舊文
來源 source: http://hdfin.stheadline.com