交易員放假
2016/08/11 08:35:51
網誌分類: 經濟
國際油價繼續拉鋸，美國能源訊息局公佈最近一周的商用原油庫存增加110萬桶至5.23億桶，高過市場預期，令一度升至43美元的紐約9月期油掉頭回落，收市跌2.5%至41.1美元。
能源板塊跌1.4%，其中Exxon Mobi
l 及Chevron分別跌1.8%及1.2%，係拖低大市的元兇。杜指微跌37點，收18496點；標普500指數跌6點，收報2175點；納指跌21點至5205點。
有分析認為美股已經升歷史高位，而投資者依家正在搵沽貨套現的理由，但又搵唔到，所以唔敢離開個市，反映牛勢仍會持續一段時間。而目前的下跌，只係大市在唞唞氣而已。
美股近期的升市，正出現典型輪番炒作的跡象，現時（第三季）表現最好的板塊係金屬原料股，期內累漲15.4%；科技股漲9.5%；銀行股亦漲6.6%，其中美國鋁業及銅金公司Freeport-McMoRan分別升10%及14%；微軟仲勁，大升17%，蘋果亦漲超過10%。呢幾個板塊，正正係一、二季時候的大輸家，而此前的領漲股，公用股、電信股及必需消費品股（consumer staples）第三季以來分別下跌了2.3%、1.5%及0.5%。
近期有唔少大戶例如格羅斯話美股已經升得好高，變得非常貴，叫人沽貨。但美股暫時頂得住，就算出現回吐，但跌少少又升返上去，在頂部橫行。有紐約分析師指出，呢個現象係由幾個原因造成，首先係美國經濟雖然時好時壞，但相較全球經濟，仍然是最好的；其次是美企第二季業績比預期理想，反映盈利最差的時候已經過去，市場預期今年下半年會更好，股市是炒前景的，市場預計美企盈利前景唔差，又唔會咁勇去沽貨；第三，係國際油價未爆煲，上周油價係咁跌，紐約期油跌低至每桶42美元，令到投資者騰曬雞，好擔心油價可能會跌返去今年2月時低位的大約30美元，但油價好快反彈，唔使1個星期反彈近9%，又令到投資者定好多，股市就跌唔落去；最後是日本及歐洲等央行和政府繼續推出刺激經濟計劃，更重要的是不但使用貨幣政策措施，仲推出財政政策，相管齊下，利好股市。
有一點值得注意的是股票恐懼指標VIX指數，已經有段日子徘徊在12點超低水準附近，顯示投資者對後市仍然好有信心，真係「無有驚過」，問題係美股已經在頂部橫行了一段日子，雖然無明顯跌幅，但亦上唔到去，原因係好多股市交易員都放暑假，令到芝加哥期權交易所市場交搬冷冷清清，估計9月1日美國勞動節期以後，大部份的交易員放完長假，交易所回復正運作，幾可肯定VIX指數將會升返上去。
股市係一個又一個循環，升得多會回，跌得多會升。短期而言，升市莫估頂，好難估中邊一日邊個位係頂。但以恐懼指數得12嚟計，再買佢跌無乜賺頭，但唔等如明日就會彈上去。
另外，前聯儲主席伯南克表又睇淡美國加息前景，話過去幾年，聯儲局對經濟太樂觀，實施的貨幣政策沒有看起來那樣寬鬆。在意識到這點之後，聯儲局官員們在接下來不是那麼急於加息，甚至可能傾向於讓經濟有些過熱後再加息。
伯南克話，試圖解讀、分析美聯儲官方語言，在當下可能不是個瞭解未來政策的好方法，這只能誤導投資者。由於過去幾年，聯儲局官員們對經濟的預測是不準確的。當前世界的樣子，和聯儲局官員們幾年前想像的不一樣。當時他們認為，美國經濟會走強，自然利率會升高。而當前經濟和政策的不確定性，比以前要高。儲局官員在意識到過去判斷有誤差之後，可能不會過多地根據他們對未來的預測做出決定，不管是對經濟增長還是對加息次數的預測。
到底伯南克是說自己的意見，還是幫手為加息預期降溫? 無論如何，伯南克的言論，亦幫手壓抑了美元匯價。
陸羽仁
回應(1) 我想回應
陸羽仁 BLOG 舊文
來源 source: http://blogcity.me