操盤手劄記：國泰業績啟示錄
■國泰現任主席史樂山已屆退休之齡，睇嚟集團又就快要換帥。 資料圖片
業績期近尾聲，上周國泰航空（293）交出一張令人O嘴嘅成績表，中期純利暴跌82%，只得3.5億元，遠遜市場預期嘅10.7億元。睇真啲仲驚嚇，主營航空業務竟蝕1.7億元，舊年同期係賺17
.8億元！如果唔係靠餐飲等非航空業務及應佔聯營公司國航（753）嘅盈利幫補，就要見紅。
燃油對沖虧損嚴重固然陀衰家，管理不善亦難辭其咎。過去十幾年，國泰隔幾年就換一次行政總裁（CEO）。陳南祿喺2004年底，接替因突然覺得份工「not so much fun」而辭職嘅唐寶麟（David Turnbull），出任CEO，係首位華人擔任此職。
陳南祿做咗兩、三年，就喺2007年中交棒湯彥麟（Tony Tyler）。湯彥麟做咗3年幾，打算過檔IATA，就喺2010年底呈辭，2011年3月底由史樂山（John Slosar）接棒。史樂山做咗3年，就喺2014年3月中接替白紀圖（Christopher Pratt）出任國泰主席，而CEO之位就由朱國樑頂上，係第二位華人擔任此職。
比對每次換CEO前後嘅業績，隱見換帥有價：陳南祿2007年中交棒，國泰2007年賺70億元，增七成，2008年竟蝕87億元；湯彥麟2011年3月底交捧，國泰2010年多賺兩倍，2011年則少賺六成；史樂山2014年3月中交棒，國泰2013年多賺兩倍，2014年只多賺兩成。
大公司講制度，唔會因為一個人離開而政策大變。不過，新人上場，總會有啲搞作，例如系統更新、架構重組。2008年到2014年間，就係PSS（Passenger Services Systems）更換訂位及離港系統，以前用Unisys，現在用Amadeus，6、7年間使咗好多個billion！
2009年又重組IT部門，300員工要按技能及公司需要重新申請崗位，藉大執位變相裁員。一批本地薑下崗後，卻另聘新人，當中有批澳洲人，人工好多都超過本地GM（GM係Level E級管理層，新請嗰班係做Level C至D嘅工作，低一、兩級）。咁好多機頭佬人工都超過本地GM，expat嘛！
當時嘅IT阿頭Tomasz Smaczny，之後由GM紥職CIO。佢認為國泰喺IT嘅投資遠遜銀行，需要加碼。大佬！銀行可以借助IT提供更多種類嘅理財產品，客戶消費感唔大；而航空就係純消費，買咗機票唔會升值！
上頭亦似乎唔多buy佢嘅理念，佢2012年7月劈炮，史樂山就喺中電（002）撬走Joe Locandro嚟做CIO，但今年6月，此君又喺新一輪IT部門重組中被請走。現時IT部門好多合約員工，downsizing易咗，相信係策略嚟。
國泰正在搞緊另一更換系統大project，請咗一批印度人，駐紥東湧。雖然今次規模唔及上次PSS，搞項目管理嘅澳洲幫又多已走人，印度幫主要搞系統開發，人工平啲，但始終要使一大筆。到國泰減少呢啲大白象，業績應會改善。
國泰現任主席史樂山現年60歲，CEO朱國樑54歲，前者已屆退休之齡，睇嚟就快又玩音樂椅。國泰半年業績係差，但睇以往換帥前後業績嘅pattern，全年業績應該交到貨，況且今年係70周年，點都要沖喜下啩！要博嘅話，等臨近全年業績先，但都唔好長揸，bear in mind，國泰簽咗超長期燃油對沖合約至2019年，有排捱貴油兼捱對沖虧損！
國泰係首間以香港為基地嘅航空公司，亦係好多港人搭機首選，公司口號係「Life Well Travelled」，但航班經常延誤，變成「Life Well Troubled」！再唔正視問題，只係怪對沖虧損、怪廉航搶客，無補於事。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com