魚樂無窮：新晉超值工業股
■天寶集團食正手機叉電概念，實力深不見底。 公司網頁
問你一條問題︰有乜情況同唔見咗手機一樣咁慘？三、二、一，開估！答案就係手機冇電。以前手機功能冇咁多，叉一次電可以用幾日，𠵱家？又要睇片、又要導航、又要捉精靈，耗電量非常驚人，所以唔少人都會有一個甚至幾個「
尿袋」隨身，需求絕對唔會細過手機，今日推介嘅天寶集團（1979），完美食正叉電概念。
天寶主要從事消費品開關電源及工業用途智能充電及控製器業務，另有產銷電子煙，主打產品正正係用於手機嘅USB充電器、無線充電器。公司剛公佈中期業績，盈利增長27%，撇除衍生金融工具後嘅核心盈利更大增87%，派息中期息每股2仙。雖然只係上市幾個月嘅新丁，但實力深不見底︰年度化市盈率僅6倍，股息率達4厘，市值只得10億銀，難怪業績後大棍崛起。
講前景，集團全力提升自動化程度，迎合中國製造2025及工業4.0等國策，盈利看高一線；睇盤路，掃貨盤絕不手軟，大戶建倉手影明顯，無他，平靚正賣點有齊，啱曬基金口味，一旦升穿近期高位1.04元，其後走勢肯定令你大吃一驚！
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com