中環在線 - 李華華 2016年8月25日
中環在線：唐家成開腔撐上市改革
■唐家成接受《A Plus》八月號訪問，表示新制會改善效率。 資料圖片
「知我是個無法討好的人……」將容祖兒個Key降低八度，等證監會主席唐家成唱呢首歌啦。事關佢忍足2個月，首度開腔力撐被市場彈到九彩嘅上市架構改革諮詢，仲豪言「做得監管機構，預咗唔得人鍾意。」
唔少金融界人士出面，對改革上市架構嘅諮詢十分有意見，證監會行政總裁歐達禮亦罕有喺諮詢期間解畫，兼且反擊批評意見。連財庫局局長陳家強、港交所行政總裁李小加都分別點評過，數來數去，係差唐家成，就湊齊4個監管者開枱。
「預咗唔得人鍾意」
唐家成接受香港會計師公會刊物《A Plus》八月號訪問，力撐新制會改善效率、加多兩個委員都亦非架床疊屋，又重申證監會並無新增權力。
佢退休前係會計四大行之一畢馬威（KPMG）嘅亞太區主席，喺公會個場梗係要扮friend，話自己都係核數師，好明白拖長上市申請對於行家冇著數，事關一旦單Job要推倒重來，客戶未必次次「超時補水」！
咁佢點睇市場咁大反響？「做得監管機構，就預咗唔得人鍾意。我哋需要確保市場運作正常、保護投資者，如果市場話『證監會真好，我愛證監會』，市民就會話，『等等先，證監會你有沒有做好你份工？』」
不過咁，市場反對聲音始終唔少，身兼體育學院主席嘅唐家成，今個星期六要向傅圓慧偷嚇師，睇嚇點用洪荒之力去擺平市場了。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com