財金冒險號：東亞顯內銀問題
■看東亞業績，就可知道內銀壞賬問題的嚴重程度。 資料圖片
今日開始，幾乎日日有內銀出業績，但唔使逐份睇，因為肯定大同小異，尤其係五大國有銀行，大概都係壞賬雙升、息差微跌，但盈利力保不失地溫和增長。中銀監話，6月底商業銀行不良貸款率為1.81%，但外資一
直唔信壞賬咁低，所以內銀股近5年來估值殘到不得了。
齋睇內銀業績，睇唔出啲乜，但睇埋有一半大陸業務嘅港銀東亞（023），就見到有啲分別。首先，東亞上半年盈利大跌38%，其中大陸業務由去年同期稅前賺6.8億港元，轉蝕2.1億元。對比唯一已出業績嘅股份制商業銀行招商銀行（3968）比較，招行中期多賺7%。盈利的鴻溝，還可理解為東亞經營效率差，或過江龍不敵地頭蟲。
貸款額及壞賬的變化就較為微妙。招行減值損失增加24%，東亞中國則增加38%，係咪因為東亞風險管理差、亂批貸款？應該唔係，東亞話自2014年中起改變了風險偏好，批出貸款的資產質素已普遍大為改善。貨款總額方面，招行按年增加了7%，估計有部份借畀還唔到錢嘅企業，新債冚舊債（從而壓低了壞賬），同時為人民服務，肩負振興經濟的重任，明知壞賬風險高都要借。東亞無政治包袱，只為人民幣服務，大陸經濟唔掂，一於收緊貸款審批，貸款總額減少3%，畢竟銀行出名「落雨收遮」。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com