一路一帶：踢爆梁振英語言藝術
■橫洲事件搞到咁大，加埋梁振英嘅語言藝術，話冇官商鄉黑冇人會信。 資料圖片
由特首梁振英、財爺曾俊華、運房局局長張炳良以及發展局局長陳茂波上演嘅卸膊真人操「推比人」，經過下午首輪「首映禮」後，暫時有咗個第一集結果，最終接咗個波要受箭靶嘅係張炳良。縱觀成個
首映，梁振英先將個波推去曾俊華，曾俊華繼續一副「it has nothing to do with me」嘅意思，加埋黑面，推番個波畀689，689又將個波推去張炳良度，張炳良又推去房屋署度，跟住個波更推咗落元朗民政事務處！
其實講嚟講去，成個首映禮只有幾個重點，首先一班高官將責任推卸落發展棕地係比較困難嘅事，仲誇大棕地嘅用途，話「棕地作業係經濟效益，會影響部份人生計」，原來呢個政府覺得同鄉紳收地，清理好貨倉係一件「難事」，但為咗發展第一期橫洲公屋，趕走非原居民，破壞家園係一件「易事」，政府要捨難取易先起第一期，簡直係笑話。
其次，689同張炳良不斷強調透過「摸底」後，得出結論係因為棕地發展困難，所以將原有17,000個公屋單位，分成3期發展，先發展首期4,000個單位，好過1個單位都冇。大家千祈唔好俾689嘅語言藝術欺騙！政府原本嘅17,000個公屋計劃，所規劃的土地喺位於橫洲嘅東北部，其中約八成為棕地，政府聲稱因為有持份者反對同收地難，所以先發展第一期，但其實所謂嘅「第一期」發展，竟然係將土地位置搬移去橫洲嘅南部綠化帶，即係根本個計劃係完全「推倒重來」，並唔係將原有「棕地改建公屋」嘅計劃一分為三期發展，而係完全取消原有計劃，改向綠化帶入手，推行另一個「公屋計劃」！
如果照梁振英所講，先捨難取易，發展咗「第一期」先，第二、三期會繼續發展，即係成個橫洲可以興建嘅公屋，係原有「棕地改建公屋」嘅17,000個公屋單位（33公頃），加上「綠化帶」嘅「偽一期」4,000個公屋單位（5.6公頃），整個橫洲會有21,000個公屋單位（38.6公頃）！當然數係咁計，梁振英擺到明官鄉勾結，所以原有嘅「棕地改建公屋」計劃又點會如期進行吖！
另外需要留意嘅語言藝術，就係梁振英話自己關心土地供應，於是親自擔當橫洲同皇後山嘅小組委員會主席，其實根據政府一貫做法，一向由最高級別嘅「土地供應督導委員會」負責土地發展，由財爺領導，點解今次一個細個多嘅橫洲委員會，要特首領導？一個小小嘅橫洲，研究咗超過4年，財爺都冇開過會，點解特首會咁上心？值得留意嘅係，根據政府公佈嘅資料，整個大嶼山發展嘅土地委員會，大過橫洲幾倍嘅土地，都只係由財爺負責，點解特首唔去負責？特首唔係話為咗土地供應發展，搞到喊曬口「粒粒皆辛苦」，大嶼山咁大嘅項目又唔見689咁上心？講咗咁耐，仲未計張炳良老屈鄺俊宇有份參與橫洲「摸底」事件，你話呢單嘢冇官商鄉黑勾結，我真係唔信！
斯郎
https://www.facebook.com/oneroadonebelt/
本欄逢周四刊出
斯郎
~TITLE_S~一路一帶 - 斯郎 2016年9月22日 舊文
來源 source: http://hk.apple.nextmedia.com