財金冒險號：
樓市驚遲買更貴？
■本港樓市近日呈異象，如華懋樓要排隊買。 資料圖片
本港樓市異象紛呈，隨手拈來兩例：華懋樓要排隊買、新盤蚊型單位廁所細到坐唔落。騎呢、低質嘅樓都爭住高價買，近期買樓嘅某位DJ一句話可做註腳：「驚遲買更貴。」
呢位DJ擲近2,000萬買入筲箕灣單位，
話「係自用，唔係投資就冇所謂，唔需要等」。買樓自住有冇投資成份，各位看倌心裏有數，否則都唔會睇財經版。
樓價上年9月見頂，年初幾乎間間大行都睇繼續跌；到本季反彈，又紛紛轉為睇升，理據不外乎低息持續、供應緊張等等，但唔知點解年初睇淡時又無視呢啲已持續8年嘅因素，難怪天水圍師奶話「樓市專家食屎」。有學者亦轉軚，理由係「全球印銀紙太多，大家都怕將來銀紙變成廁紙」。
《六祖壇經》有個故事，兩個和尚望住一支風中飄揚嘅旗，一個話風動，一個話旗動，六祖惠能就話其實係你哋心動。
樓市都一樣，呢一年來，樓價V型反彈，唔係利率前景變，亦唔係供應變，只係買家「驚遲買更貴」，典型的panic buying。樓價開始回落時，買家都想等跌多啲，等咗大半年，積存咗唔少購買力，一見反彈，就驚執輸衝入市。樓市之慣性較股市強，此輪反彈唔會咁快玩完，但當新盤逐漸消化掉上半年積存的購買力，動力就會減弱。無論買股定買樓，「驚遲買更貴」往往係悲劇嘅序幕。
笑笑生
mailto:sneeringman@gmail.com
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com