科網股人氣未散
2016年09月22日
新世界發展(017) 昨日公佈業績，不過，塘邊鶴更有興趣嘅係最近鬧哄哄嘅橫洲公屋發展計劃，竟然燒到佢身上，話佢喺項目附近有綠化地，懷疑政府有益佢之嫌，主席鄭家純出嚟解畫都有啲㷫，話在橫洲都被政府收了7萬多呎地，餘下10萬呎地仲等緊城規會是否批
准改用途，佢哋係苦主至真。
世界難撈，政爭扯財團落水，新世界在橫洲的17萬呎農地早在1992年已買入，如今都被人拉埋入去話明益佢。
另外新世界在業績公佈，透露截至今年6月底止，集團持有應佔總樓面面積約830萬平方呎土地儲備位於新界，持有合共約1750萬平方呎待更改用途應佔農地，主要集中於元朗。香港市區密度咁高，試問有邊間大地產公司唔喺新界買地，不過特首戰臨近，自然搵嘢嚟插。
新世界盈利勝預期
唔講政治，講番新世界業績，集團今年6月底止，基本溢利為96.62億元，按年上升43%，若剔除應佔外匯兌換影響及出售5個位於中國內地、由新世界中國持有的發展項目收益，全年經調整的基本溢利為68.93億元。
每股盈利95仙，末期股息31仙。瑞信績後報告就話，佢年度核心盈利同比升2%至68.93億元，優於該行及市場預期。
中資股最近表現好番啲，大行出推介報告都多左。花旗啱啱發表報告，分析2015年10月中國海外(688) 分拆出嚟嘅物管公司中海物業(2669) ，估計2015至2018盈利中海物業複合增長率可達42%，股本回報率可維持超過20%，花旗認為中海物業上半年純利大升1.15倍，已顯示其強勁估值能力，首予目標價2.1元，折合明年預測25倍市盈率，該股昨日收報1.73元，升值8%。
港股繼續爬升，恒指收報23669點，漲139點，國企指數收報9849點，上揚97點，成交金額650億元。交投唔多下，科網股最受追捧，騰訊(700) 升1%，造211.2元，向恒指貢獻25點升幅，管理層執位兼早前獲野村升目標價的金山軟件(3888) ，股價升7.7%，造19.1元；博雅互動(434) 炒高12.6%，造4.53元；IGG(799) 漲5.6%，造5.44元。中金昨出報告升金蝶國際(268) 目標價，股價升5.6%，造3.19元。
科網股今年下半年當炒，騰訊炒不停，其他科網股昨日都唔錯。如果有留意，阿里巴巴主席馬雲剛獲委任為聯合國貿易和發展會議(UNCTAD)青年創業和中小企業特別顧問，呢個新職嘅主要職務，是令年輕創業者和中小企更加容易參與全球貿易，特別是發展中國家的創業者和中小企。
阿里股價再破百美元
由於阿里巴巴無喺香港上市，港人對佢股價無咁留意。睇番佢嘅股價喺今年下半年由74美元左右的低位起步，最近升穿100美元，差不多彈左三成，明顯跑贏大市，反映科網股嘅升勢，係外圍同香港互動。香港嘅科網股輪流炒，好似陸羽仁提過嘅新意網(8008) ，呢個月再創新高，升到去3.6元的一年高位，累積升幅同阿里差唔多。
新意網同阿里唔同，阿里係講創意，不斷開拓新嘅電子商貿領域，新意網主要係做網絡基建，佢嘅競爭無咁激烈，增長無咁勁，但就穩定啲。由於派息仲有3.57%，所以吸引左資金流入。
陸羽仁
金融High Tea 舊文
來源 source: http://hdfin.stheadline.com