笑到最後：金沙開賭場再升過
■金沙旗下巴黎人早前開張，參考新賭場升軌，集團股價應可升兩成。 資料圖片
現時先推介濠賭股，可能係遲咗一段時間，始終好多隻賭股都反彈咗唔少，如金沙（1928）由7月低位反彈咗36%；銀娛（027）則彈咗34%。但炒股係睇未來，好多因素反映濠賭股又重返升軌。
始終世界離唔開抄襲美國模式，亞洲抄得最徹底。澳門幾勁都好，都係「東方拉斯維加斯」，仍要向拉斯維加斯學習。拉斯維加斯已經唔係賭城，而係一個度假展覽中心，最早89年有賭場開始興建景點或全套房酒店。喺99年，拉斯維加斯嘅非博彩收入已經多過博彩收入。
08年賭場同房地產過份發展，金融海嘯成為受害者，於是轉型做展覽、夜總會等非博彩業務，博彩收入喺08同09兩年倒退，但轉型成功，2010年再次增長。澳門博彩收益經歷26個月按年倒退，終於喺8月按年升1.1%，調整期大概同拉斯維加斯金融海嘯時相若。現時拉斯維加斯非博彩收益佔逾六成，澳門只佔15%，但係各賭股喺中期業績時都大數如何發展非博彩事業，足見澳門有潛力，即使潛力一路深潛，至低限度先有憧憬支持股價。
李克強10月10日訪澳成為焦點，如果有好消息，只能夠當半賣半送，因為澳門一早已經跪低，毋須再作統戰，唔使畀小恩小惠收買人心。何況過去兩年，澳門政府以至市民咁「聽話」，又換嚟中央啲咩優惠措施支持博彩收益？客觀結果係博彩收益連續26個月倒退，所以「聽話」同著數係冇關係。
澳門每次有大型賭場開，賭股都會升。好似銀娛喺路氹嘅「澳門銀河」綜合度假城，2011年5月15日開幕，3個月升超過四成；就當當時賭業正在膨脹，開唔開賭股都照升，近期有永利（1128）嘅永利皇宮喺8月22日開幕，股價先回後升，最多升22%，至今都升13%。9月13日金沙開巴黎人，至今股價未升過，參考新賭場升軌，股價升兩成，短線先睇40蚊。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com