細奀時代：港人都可以做比利
■港人是時候放低上車包袱，學習球王比利和巴西足球的精神。 資料圖片
無保險，球會唔會理，不幸受傷被迫提早收山，下半世就要住貧民窟清潔維生，自己老豆便是人辦。假如你是15歲的比利，到底會選擇冒險離鄉別井，到大球會試腳，將一生前途押注賭一鋪，還是穩穩陣陣讀好
書，搵份收入較好的牛工？
睇電影《球王比利》有極大的共鳴，因為當時巴西足球面對的困境，和今日香港的情況十分近似。巴西在1950年作為主辦國決賽大熱倒灶，加上54年八強出局，開始質疑自己的傳統風格「Ginga」，而決定仿效歐洲的陣地式戰術。比利雖然極具天賦，卻無法融入陣式，以至表現欠佳，幸好最後能夠堅持自己的身份認同，並且成功感染隊友，重新以Ginga迎戰，奪下世界盃，成就傳奇。
近年中港融合，香港的營商生態以至整個社會環境都起了極大變化。30年前香港雖然細，卻創意十足、活力澎湃，轉數快而且好玩，以電影業為例，更統治亞洲、影響世界。可是，近年中國經濟高速增長，初期是有批香港人把握機會搵了一筆快錢，但一來國內錢太容易搵，於是粗製濫造，做壞招牌，一心標完尾會便算；二來樓價水漲船高，新一代未出閘便已經被沉重的壓力打殘，失去上一代那種好玩的心態。
巴西人要被迫踢歐洲戰術，正如一個香港小朋友被告知要成功，就一定要讀好書考好公開試，然後做律師做醫生，才是人生勝利組；又或者好像一個香港商人，被告知要北望神州，好好把握一帶一路的商機。自我局限，成功率又低，自自然然搞到成個香港都不快樂，正如比利的白人前鋒隊友馬蘇拿一樣，一個意大利裔巴西人，不懂Ginga，又不被歐洲人接受，處於一個兩面不是人的狀態。
戲中有句對白印象深刻，巴西教練說決賽勝負未知，卻肯定巴西隊可以踢出一場精彩的比賽。香港人其實是時候放低上車的包袱，重拾類似Ginga那種「最緊要好玩」的風格，而唔應該甘於跪地餵豬乸，輸也要輸得精彩、輸得過癮。
曹星如剛剛拿下20連勝，李慧詩能夠達到世界級，但他們肯定不會是因為要買樓而打拳踩單車，當然他們都是百萬中無一，至少說明「it"s ok to be different」，我哋唔得，可能係因為我哋唔夠努力、唔夠堅持。
其實最值得學習的，是比利父母的精神，明明自己追求夢想的路上中了伏，要洗廁所，依然鼓勵及支持比利去追求夢想，人窮更加唔可以志短，夢想也是需要一代一代承傳落去。
阿飛
本欄逢周二刊出
阿飛
細奀時代 - 阿飛 舊文
來源 source: http://hk.apple.nextmedia.com