用大數據優化投資
2016年10月11日
香港昨日重陽節放假，內地已是國慶長假後開市，上證綜指升1.5%，收3048點。唔好見內地升就太高興，佢地係放左一星期假後的結果，香港上周表現唔錯，大體上反映了這種結果。
上周是環球金融非常波動的一周，股市雖然變化不大，但外匯及商品市場則出現大幅波動，其中最驚嚇的是英鎊
匯價。上周五的清晨，英鎊閃跌6.1%，兌港元低見9.1，其後很快反彈上9.6港元水平，收報9.649。
英鎊下跌的主要原因是首相文翠珊提出明年3月初將啟動脫歐程序，還講到明不是半桶水的「軟脫歐」，令外界很擔心是一種「硬脫歐」模式，即係英國不容許歐盟護照自由入英國，歐洲市場就同樣不會向英國免稅開放。另外，文翠珊又在保守黨大會上批評英倫銀行減息，令到退休金的回報下降，叫人擔心英國政府會干預央行的行動。
以上種種因素觸發淡友趁成交比較薄弱的時候發功，猛力把英鎊匯價推低，觸發大量止蝕盤平倉，才令到鎊匯急跌，否則英鎊即使比較弱，但不至於在一日內急插6.1%。我對英鎊看法是短期仍會向下，到脫歐亮牌時英鎊兌港元見9算的機會較高，但有大行睇英鎊兌美元見1算，即兌港紙要見7.8，我就話機會低少少，大約20%機會，睇得低入貨風險自然低，但亦有機會買不到。
英鎊閃跌 短期仍軟
另外，市場傳出歐洲央行可能會縮減量寬規模，美國可能會早於11月加息。這些消息令到美元上升，黃金等商品價格急回。然而，美國上周五公佈9月非農就業增長人數只有15.6萬人，失業率升至5%，而市場預期新增職位為17.6萬個，失業率則保持4.9%，美國就業市場沒有預期般好，令到市場對聯儲局提早加息的憂慮緩減，商品價格略為反彈。
我估美元將在12月加息前升上較高位置，黃金等商品也會在差不多時間才見一個小底，所以仲有1個多月要捱價，除非特朗普選上美國總統，避險情緒急升，出現呢啲黑天鵝，美元就可能急插。不過，睇埋第二次美國總統選舉辯論，加埋特朗普畀人狙擊爆佢的出位錄音，暫時仍有係希拉莉睇高啲。
投機、投資 分開管理
我早前介紹過大家用一個投資組合管理的網上工具叫Ticker(可用此名稱在手機應用商店查到，或上網站www.ticker.com.hk)，這個App由本地公司Innopage研發，我都有份投資，主要是試用後發覺非常好用，更有發展空間，而且不但可針對本地市場，其英文版世界各地都啱用。
我們傳統用財網App都只係睇吓報價，並無組合管理功能，若你投資股票數量較多時，按完幾個冧巴，都不知自己今日賺蝕幾多。Ticker主要作用不但是睇報價，而是管理你整個組合，或者同時管理多個組合。
我經常叫大家買股票要分開「投資的我」和「投機的我」，講就容易，做起上嚟就有難度。你在銀行或經紀行開個戶口買股，佢哋將你買所有股票放在一起，水蛇春咁長，睇到眼都花。你可以用Ticker將組合分開，例如一個係「投機的我」，一個係「投資的我」，就可以清楚比較，我的核心理念是一般人投機好難贏，你不分開組合好難驗證，若然最後發現果真如此，是「投資的我」勝過「投機的我」，就應該加大投資，減少投機。當然若你改善投機的表現，其中一個做法是定出10%止蝕，在Ticker內可以用「我的股價提醒」功能，一到價止蝕就通知你。
Ticker出了最新版本，加入最新開發的大數據功能，可以幫大家改進投資技法。這是一個共享概念，大家加入後，所有組合的數據以匿名方式分析，得出很多有意思的數據，這裏可以舉兩個例子：
第一，大部份組合近兩個月才由負轉正。在Ticker的大數據功能中，可以見到自己組合和其他組合的比較，可以假設使用Ticker的主要是散戶，一比就知道自己是好過其他人，還是差過其他人。若睇散戶組合過去一年整體情況，在兩個月前大部份組合還是見紅為主，但如今大市升到23851點，就有53%組合過去一年有正回報，但大部份賺價不多，15%只賺0至5%，13.5%賺5至10%，有0.5%係人精，佢哋賺50%以上。另外唔好忘記仲有47%要輸錢。
若然你過去一年有賺，恭喜你，你已跑贏一半散戶啦。大市升近24000點，如果已經近高位，散戶賺比例仍然不高，投資表現比較麻麻。大市一回，又係輸多贏少。
第二，表現最佳股是騰訊(700) 。Ticker抽出組合總值超過100萬的大散戶組合，分析當贏錢組合的贏錢股票，以「資金加權平均收益率」計，十大贏錢股票依次為騰訊，友邦(1299) 、盈富(2800) 、領展(823) 、恒生(011) 、置富產業信託(778) 、建行(939) 、工行(1398) 、中電(002) 、煤氣(003) 。
大股跑出 細股難贏
睇呢啲最賺錢股有得着。最賺錢股全部都係大股，無乜神經4線股可以令散戶贏到大錢，第一個經驗係唔識買股買大股，衰左可以守。
見到騰訊個名排第一，完全唔意外，因為佢係股王，一直有超水準表現，但見到盈富排第三有小小意外，盈富等如恒指，盈富竟然排第三，第二個經驗，真係唔識買股買盈富就算。股神巴菲特話唔好買基金，因為好多基金經理跑不贏指數，睇落都有啲道理。
另外細心分析大散戶買股贏錢的手法，都唔係死坐，一年都出入一兩次。佢哋通常係比較恐怖時買入大股(如今年1、2月間)，部份要捱吓價，然後坐定定一段時間，到8、9月已開始分段出部份貨。第三個經驗係要人棄我取，人揸我沽。所以呢啲大散戶買騰訊啲直升股反而食唔盡，好似內銀股呢的股食波幅都有不錯表現。
低吸高沽 唔係死坐
第三，過去一個月表現最好的是金山軟件(3888) 。金山整體是上落格局，但自7月去到全年低位12.7元後，呢三個月大反彈，現價19.3元，所以短期表現很亮眼。其餘過去一個月有表現的股份多數是石油石化股，和油價轉勢有關。
如今是一個大數據的年代，如何活用數據，尋找投資機會，係一個極為重要課題。Ticker呢個App本身已是協助我們管理股票投資的好工具，如今加埋大數據功能，可去佢網站慢慢研究(www.ticker.com.hk)，經常睇睇成功和失敗的個案，真係可以優化自己投資的手法。
陸羽仁
金融High Tea 舊文
來源 source: http://hdfin.stheadline.com