金手指：不問價直追俄鋁
■現時嚴重落後的鋁價，將會追回其他商品升幅。 資料圖片
特朗普當選，變，來緊。有幾項花旗國政策，將會大改。而分析員非常落後，睇唔到當呢幾個政策一變，互相推波助瀾下，大家要不問價追俄鋁（486）。
首先，就係花旗國同俄羅斯嘅關係大幅改善。你睇傳統傳媒分析，都係
講緊啲軍事嘢，冇講美帝畀啲咩壓力落俄羅斯企業。花旗國財政部同司法部處處緊迫俄羅斯公司，特別錢嘅流向。聽聞有基金經理想買俄鋁，都冇，因驚花旗政府秋後算賬。
而當美俄關係改善，好似俄鋁呢啲有全球業務嘅俄羅斯公司，管理上、財政融資上嘅成本可進一步受惠。另一政策改變，就係美帝同大陸啲玻璃心直接交鋒。之前，你話「大國崛起打瓜你」，美帝唔理你。不過因之前大陸瘋狂放貸，公司過份投資，產能過剩。到今日為避呆壞賬，國有銀行鼓勵債仔公司維持現金流去還息，賤價賣產品嘅情況，遇到特朗普就要停。
因你為還息而不計成本賣貨，特朗普會抽你關稅。而喺2009年至今，特朗普都未贏之前，俾美政府嘈得最緊要嘅產品，就係鋁。大陸產能超過剩，賤賣產品，全球市場佔有率由三成升到五成，鋁價亦冇運行。不過，相信特朗普同強國打嘅第一個貿易架，就會係鋁。而聰明嘅習大大，一定畀特朗普贏，所以會叫大陸啲鋁廠減產、減產能。現嚴重落後嘅鋁價，將會追回其他商品升幅。
全球其他呢幾年捱打到股價反映「冇得做」嘅鋁企，毛利率低，所以賣價升少少，毛利會賠升。所以一定要不問價追，鋁價之前可恥地低，今日都仲有四厘股息、但只得十倍市盈率嘅俄鋁！揸幾年倍升！
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com