金融High Tea 2016年11月22日
金融股輪流炒
2016年11月22日
港股第四季上上落落，資金換馬頗為明顥。恒指昨日雖然只係幾十點上落，但中資保險股就炒左上嚟，扭轉今年弱勢表現。
中資保險股向好，主要係有大行唱好，話佢地會受惠內地債息回升，呢樣嘢講起上嚟，感覺同呢排美國長債息口飆升利好外資保險股有啲似，關鍵只係內地債息係咪真係會跟外圍咁向上啫。
據德銀保險發表嘅報告，認為隨著A股上揚及內地10年期國債孳息率見底回升，內地保險商基本因素轉番好啲，預料佢地股價可望回升。報告話，由於市場憂慮投資收益及資產質素，即使保險商新做保單價值(VNB)增長強勁，該板塊股價今年以來已跑輸國指約10%。該行認為，其實呢個憂慮在內險股股價已經反映，因為中資保險商逾70%的承保屬隨投資表現變動的分紅保單，成本約3.5%至4%，僅2.5%是保證的。在現時存息低企，保險商有空間削減保單回報，以轉嫁收益低企的壓力。
內險股紛紛發威
喺內險股中，德銀最睇好國壽(2628) ，予「買入」評級及目標價31.4元；仲有中國太平(966) ，予「買入」評級及目標價32.1元。報告話，國壽自今年3月起，已削減萬用壽險回報率120基點至3.85%，屬上市同業中最低，反映其有彈性，將低收益壓力轉嫁至保單持有人。
除左德銀，花旗都出左報告唱好內險股，咁啱內險股最近公佈首10月保費收入均錄升幅，喺好消息大合奏下，內險股昨日表現標青，內險股成升市主力，其中新華保險(1336) 創一年新高，曾高見37.75元，全日大升4.6%，報37.2元；國壽曾見21.05元，全日漲5%，報20.95元；中國太平(966) 升幅相若，報16.98元；平保(2318) 、太保(2601) 都升逾3%。
金融股今年頭三季表現都係一般，但隨著美國加息有機會扯高資金回報率，金融類股份開始有啲轉勢，資金炒完外資金融股，又走番一轉中資金融股，睇嚟喺年底前嚟番轉輪流炒。
中資金融股有勢，拉動港股向上，不過公用股就拉牛上樹，令市況未脫好淡爭持。恒指收報22357點，只係升左13點；但國企指數就收報9444點，漲足95點，遠遠跑贏大市，成交就有636億元。
美元匯價繼續亢奮
中資金融股有炒作，但短期都仲要睇住人民幣走勢。由於美元強勁，人仔兌美元即期又收跌44點子，報6.8956兌1美元，與12連跌的中間價，雙雙迫近6.9元關口，再創近8年半低點。離岸人民幣都跌95點子，報6.9104，較在岸收市價低148點子。
交易員認為，若美元續強，人民幣不排除跌破6.9元關口的可能。人仔匯價弱，咁資產同收益喺內地嘅中資金融股，股價點都會受到壓抑。
人仔弱，其實係反映左美元強，美匯指數上星期重上100水平，跟住唔止企穩呢個水平，而且繼續向上左啲。安聯投資亞太區股票首席投資總監陳致強喺一個研討會時就話，美元近期走勢，已反映市場加息預期，佢12月宣佈加息後可能有調整，其後走勢則視乎未來美國通脹發展，市場普遍認為明年會加息兩次。本來市場都預期美國經濟唔係咁好，難以承受美元咁弱同美息太高，只不過特朗普新政嘅憧憬改變左市場睇法，O依家就睇呢種亢奮狀態維持到幾耐，可以講係佢亢奮得愈大，調整起來嘅力度會愈大。
陸羽仁
金融High Tea 舊文
來源 source: http://hdfin.stheadline.com