笑到最後：繼續持有彩星玩具
■彩星玩具執行董事杜樹聲
彩星玩具（869）係高明舊年推介嘅股票，上周五收市後出咗業績，身為一個負責任嘅評論員，有必要再作出解讀，特別係盈警之後出嘅業績。
彩星玩具全年純利1.1億元，同2月21日時彩星發盈警講嘅水平相若，下半年僅賺1,500.9萬元，好過
完全白做咁解。末期息派0.05元，下半年每股盈利0.0123元；全年合共派0.1元派息仲多過全年每股盈利嘅0.0909元。
另一個比較關鍵嘅數字係現金同流動資產數字，以為盈警會燒咁啲錢，實際上現金維持到逾10.07億元，現金股票再加埋殼價，合共16.8億元，折算每股約1.39元，亦都解釋咗彩星玩具股價除出盈警時震過之外，大部份時間守得住1.39元呢啲水平，因呢個已係隻股嘅成本價。但真正憧憬要睇業績，純利數字顯示，忍者龜已經玩完，業績都有提到今年初會出第五集卡通片，但純利唔配合，亦估計出咁多季嘅新鮮感已完結，好多美國小朋友或有玩具喺手，唔會再買新嘅忍者龜。
真正憧憬可能來自百獸王Voltron，嚿年6月先再始播，紅到今年1月出第二集估計銷售未必入得切賬，亦都話秋季拓展產品。至於高明有時講呢隻股時，有網友會話𠵱家啲小朋友玩手機多過玩具，其實彩星啲玩具偏向係簡單膠公仔，應該唔會太受手機影響，反而擔心其他動畫嘅玩具競爭仲好，不過玩具市場有幾何競爭唔激烈？
睇完業績之後，高明宣判：繼續持有彩星玩具。以本欄推介價1.23元計，仲有好多水位等。原先最擔心嘅係營運冇出路要燒錢，但業績顯示仲有超過10億元，更照派高息同回購，即係冇乜大礙，現價1.44元接近成本價，可以信住百獸王先，一旦有料到，目標價可以睇2蚊；即使有差池現價都貼近成本價。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com