智取大市：要點樣做大贏家
■手機app美圖秀秀
炒股賺錢唔容易，但時來運到，可以贏到你唔信，美圖（1357）加IGG（799）兩隻重鎚撲中曬的話，係你會點做？最理想係拿拿臨搵第三、第四隻爆升股，要贏就贏到盡。
就好似近排中央，手風順到不得之了。先喺立法會選舉後，時來運到遇到梁遊宣誓嘅
機會，一嚇DQ咗兩人，順便分化本土派，先勝一大仗。然後趁一批本土派、投機派動搖之際，碰巧特首選舉，先將689拉下馬，然後捧上奶媽，再畀薯片入閘，後者大搞關公親和力，親民建制派奇跡吸納唔少中間派、泛民支持者、甚至部份本土派，堅持己見就比人鬧成「原則派」。自回歸以來，主流反對派同建制派從未如此一家親，以後親和建制派就成為反對派新勢力，咁都得？中央真係贏得誇張，猶如港股大時代。
換轉正常老散，可能收手袋袋平安就算。但中央領導人貴為大戶中嘅大戶，自然懂得打蛇隨棍上之道理，之後會點？唔使畫出腸。手風順呢家嘢，集結天時、地利、人和，可遇不可求。首先要遇上機會，仲要配合操盤出色，才能將機會轉化成巨額盈利，投資者遇上咁珍貴嘅時刻，要好好把握，至少要留待補貼他朝手風不順時嘅挫折。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com