智取大市：選中硬淨股先有得守
■國藥是內地藥品分銷商。 資料圖片
個幾星期前嘅3月16日，出現單日大升市，當時同大家講以平常心持有強股便行，去到7個交易日後嘅昨日，港股已經跌到低過單日大升市收市價，二三線股仲要洗倉，但又毋須睇到死人冧樓。避免重倉冒險輸返轉頭固然重要，同時亦要選硬淨強
勢股先能夠好好打守勢波。
康哲藥業上星期四公佈舊年多賺38%，每股盈利55.32分，業績後連升兩日破頂，創近2年高，喺二三線洗倉日都仲升到2%，收14.36元，距離兩年前港股大時代創下歷史新高15.54元唔遠，似乎唔難突破。
點解逆市升咁強？皆因歷史市盈率只有22.9倍，以最優質藥業股嚟講，估值再高都唔過分，講緊之前一隻年增長三成藥股，都賣到30倍PE。雖然內地藥業增長相比過去幾年遜色，但係內地對於海外高端藥品需求大，而康哲主要由外國引入藥品，再向內地醫院銷售，行情食到應，前景亦非內地藥品分銷商國藥（1099）可比擬。兩會話要打擊藥價虛高問題，但對於呢類真正有需求嘅海外高端藥品，其實長線難有打擊。
23倍PE同30倍足足有三成差距，唔好講話要升到足，但求逆市升，就已經係揸得穩嘅理由。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com