財路：吼聯想博財息兼收
■聯想預測PE得10倍，兼有高達5厘息墊底，諗得過。 互聯網圖片
聯想集團（992）噚日除息效應下，股價挨番近一季低位，明年度預測PE得10倍，兼有高達5厘息墊底，有得諗。
聯想上個財政年度（今年3月底）虧轉盈41億（港元，下同），兼每股派息0.265元，現價折合
息率5.5厘。聯想2016年度見紅蝕10億，當時，集團要為之前收購摩托羅拉手機，進行整合，要大撇減，搞到大出血。
又綜合報載，掌舵楊元慶話，完成咗基礎建設中最艱難嘅轉型工作。又包括數據中心、個人電腦同智能設備等等，都引入新管理層，實行幾頭馬車，並駕齊驅。
睇到係，由財務業務整合撇減，到管理層執位，全方位整合，聯想又可以輕裝再上路。
聯想個人電腦同智能設備瓣數，仍然係集團主要收入。據IDC報告，今年全球個人電腦出貨量增長0.6%，比原先預期下跌好，兼且係自2012年初以嚟，首次再錄到增幅。
雖然，聯想呢季俾惠普爬頭，但場內分析，只係涉及季節性因素，而電腦市場好轉，則主要係商戶客戶增幅帶動。亦睇到，電腦市場有勢turnaround下，聯想作為全球性龍頭，呢瓣有望回穩，兼銜接手機同其他IT瓣數發力。
場內專業預測，聯想2018年、2019年同2020年度EPS0.4元、0.49元同0.51元，現價4.8元嘅預測PE13.3倍、10.7倍同10.4倍。場內另一電腦大孖沙惠普（美HPE），今、明、後三年預測PE12倍、12.3倍、11.7倍，華碩（台2357）12倍、11.6倍、11.4倍，又場內手機瓣數，蘋果（美APPL）三年預測PE16倍、13.6倍同13倍，聯想抵搞。
買聯想，當升20%到5.8元咁計，明年預測PE12.8倍，比行家高咗少少，但集團到時預測息率，仲有成4.5厘，博財息兼收，實情係好吸引。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com