東方海外對得住股東
2017年07月11日
東方海外(316) 賣盤唔嫁又嫁，雖然公司扭扭擰擰成日唔認，但呢個世界空穴來風，定必有因，呢單交易終於成事公佈，買家一如市場早前盛傳係中資企業。中遠海運集團旗下的中遠海運控股(1919) ，會和上海國際港務聯手，按每股78.67元收購價
，向東方海外股東提出全面收購，涉資逾492億元，收購價較上周五東方海外收報60元，有溢價31%。由於收購價高過傳聞，小股東若然仲有貨，呢舖真係笑晒口。
東方海外呢次賣盤，將會保留上市地位，財務顧問打晒開口牌話賣得過。陸羽仁都認同呢個睇法，皆因佢嘅主要業務係貨櫃船業務，其他資產唔係咁多，呢次大股東賣股，個價已經將佢嘅潛在價值一次反映晒出嚟，將來要配售維持上市地位，相信唔易做得番呢個價，買家有相當可能帳面上要吃眼前虧。
大股東有買錯無賣錯
今次交易《華爾街日報》節節領先，一直話緊斟盤，公司就一直唔認。交易曝光後，有人再放料畀《華爾街日報》話大股東董氏家族係受阿爺所壓賣股，有股民話咁係咪即係賣平左？對於呢個「受壓」的講法，陸羽仁好有保留，首先係報道嘅講法好虛；再者，呢個世界有買錯、無賣錯，公司值幾多錢，唔通大股東心中無底，董氏大家長係國家領導人，又話同美國政界有好深嘅關係，係咁背景下，唔通中央會逼佢賤賣資產咩？話阿爺壓佢賣產，咪傻啦，如果唔到價，我就唔信佢會賣。
如果有人話董家係受到壓力，咁最大可能係大陸嘅航運公司不斷擴張，其他公司根本無力競爭，係商業上根本好難再留係呢個行業，就真係有壓力。所以只有善價而沽，小股東而家有機會靚價而走。所以唔好信真係以為有人施壓，錯過靚價沽貨機會，真係「蠢」啦。
回過頭嚟講，東方海外係上一代船王董浩雲年代，一度好威水，但其後因為航運不景搞到債務重組，20年前回歸佢股價只係值幾元，但之後佢食住中國變成世界工廠，大做運輸生意賺左唔少錢，後來又在大陸做地產撈一筆，到而家賣產，多年來派過唔少股息，連同呢次賣盤相信係最後一次益股東，合共每股收左100元以上。有胡唔食，罪大惡極，董家呢次把握機會同小股東齊齊落船，真係值得俾個讚佢O架。
喺賣盤消息刺激下，東方海外股價爆升20%，收報72元；中遠海控升5.41%報收4.29元。連帶部份航運及港務股亦向好，中外運航運(368) 升9.23%報2.13元；中國基建港口(8233) 升6.96%報1.23元。
阿媽賣產萬店炒番轉
除左航運股外，當中大市昨日反彈，因為美國就業數字好加息機會高，金融股表現較佳。恒指收報25500，升159點；國企指數收報10214，下跌37點，成交802億元。中國平安(2318) 升1.3%，報54.8元，財險(2328) 創一年新高，曾高見14.88元，收升4%報14.82元。滙控(005) 漲左2%，同時創出一年新高，渣打都漲左2.5%報收82元，恒生漲1%報163.2元。
萬達商業、融創中國(1918) 發佈聯合公告，萬達將13個文旅項目的91%股權轉讓給融創，並由融創承擔項目的現有全部貸款，融創房地產集團則以335.95億元人民幣收購萬達項目76間酒店。受到消息刺激， 萬達集團旗下在本港上市的萬達酒店發展(169) 一度炒高1.55倍，見1.48元，午後升勢回軟，收報0.86元，仍漲47%。睇番萬達酒店嘅項目，好多都係係海外，同今次嘅合作未必有直接關係，不過佢市值只有28億元，阿媽賣產賣得咁高興，市場就憧憬佢沾到小小邊，所以都炒番一轉。
陸羽仁
金融High Tea 舊文
來源 source: http://hdfin.stheadline.com