大棋局：中國攻堅數字貨幣
■民間數字貨幣有價，其中一種睇法認為佢同黃金一樣稀有。 資料圖片
人民銀行旗下的數字貨幣研究所最近低調掛牌。央行主導數字貨幣的關鍵在於，呢套嘢唔再冇王管。無論bitcoin、Ether定其他數字貨幣，現時其存在意義，第一係政府好難監察，第
二係政府唔可以話印幾多就印幾多，即所謂的去中心化。所以民間數字貨幣與央行數字貨幣之爭，其實就係無政府主義與大政府主義之爭。
清朝嘅戶部銀行，後來變成中國銀行；民國嘅中國印鈔造幣總公司，今日仍然作為內地中央造幣廠。數字貨幣研究所掛牌於中鈔子公司同一大廈內，可見其定位，此其一。由央行發行數字貨幣，不等同人民幣電子化，唔係信用卡、電子支票或八達通概念，而係以一種新貨幣存在，此其二。近百年全球貨幣體系之演變，離唔開「錨」這個概念。無論貨幣背後係黃金、石油，還是國民未來稅收等等，都要有錨才能為貨幣定價。民間數字貨幣有價，其中一種睇法認為佢同黃金一樣稀有，例如bitcoin最終只能產出2,100萬粒，故暫時而言，數字貨幣之錨在於其發行量。
過去要印多啲銀紙就後面加個0，將來可能調轉喺前面加個0。莊子有句話，一尺之棰，日取其半，萬世不竭。一碌木今日斬一半，聽日斬今日剩下嘅一半，一萬世都斬唔完。民間數字貨幣以發行量為錨，需要更多時便將其分割更細。但央行的數字貨幣會以乜嘢為錨？
問題就喺呢到。如果央行數字貨幣背後之錨不同於現時之法定貨幣，用一句話單刀直入，就係準備去美元化，或起碼減低美元之影響。
現時全球嘅外滙儲備美元佔65%，人民幣即以美元作發行基礎。在美元萬劍歸宗大勢下，中國若維持呢種貨幣發行制度，注定要通縮；若想靜靜雞印多啲銀紙，人民幣就唔係現時呢口價。所以點解中國咁急想做第一個央行發行數字貨幣嘅國家，原因在此。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com