操盤手劄記：轉戰AI晨訊殺上
■晨訊業務由智能手機、物聯網擴展至AI，若取得較大成果，估值可望重估。 互聯網圖片
北水助陣，港股收復26000關，騰訊（700）亦收復280元關。上周迄今，騰訊手機遊戲《王者榮耀》俾《人民網》同《人民日報》五度筆誅、《新華社》兩度筆伐，但股價依然硬
淨！大陸又話支持電子競技，更會喺2022年杭州亞運會首度設立電競項目，點解又鬧爆《王者》呢？國策真係玄妙！
阿爺對科技業態度有變，可能同科技巨頭嘅影響力越來越大有關。講嘅唔只係吸金能力，仲有主宰其他行業興衰、主導生活文化興替嘅能力。手機可以購物、理財乜乜乜，唔少行業因而式微；人工智能（AI）出現，更多工種將被取代。當科技發展有能力影響政府管治，政府幹預唔奇。投資科技股，要留意箇中風險。
官媒圍插《王者》，主要係兩宗罪：一、令細路沉迷，玩物喪志；二、歪曲歷史，教壞細路。咦，武俠小說、電視劇集咪隨時瀨嘢？大台套《大太監》中姚雙喜（黃浩然飾）係公公，慈禧太後確係有個近寵叫雙喜，不過係宮女喎！武俠小說不符史實，更不在話下。
歷史書記載嘅，係咪一定真實？西晉皇甫謐《帝王世紀》記載伏羲阿媽華胥氏去雷澤郊遊，「有巨人跡出於雷澤，華胥以足履之，有娠，生伏羲於成紀。」嘩！踩下個大腳印就懷孕，難以置信囉！伏羲嘅最大功績係發明八卦，到十七世紀，德國數學家萊布尼茨受八卦啟發，發明二進制，成為電腦誕生嘅契機。計落伏羲係科技股之父！
科技股有好多瓣，AI同大數據仍然係大趨勢，近日留意到業務由智能手機、物聯網擴展至AI嘅晨訊（2000），公司上周五話傾緊賣2G、3G、4G項目，本周一又交出唔錯嘅營運數據。
雖然晨訊只係市值10億元嘅中小企，但AI潛力大，若取得較大成果，估值可望重估。該股六日四度破頂，現價0.425元，每股資產淨值0.792元，市賬率只係0.54倍。走勢上，更呈現區域突破同三角突破利好訊號。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com