一路一帶：林鄭的「劏房傳心師」
■林鄭政府解決住屋問題竟然係劏房合法，唔知邊個高人諗出嚟嘅呢？ 資料圖片
「曾經有一隻強勢嘅316喺我個倉，但我冇去珍惜，到沽咗嘅時候才後悔莫及，塵世間最痛苦的事莫過於此。如果上天可以畀多次機會我，我會同大家講，加注，如果可以係呢隻股份加上一個禁售期，
我希望係一個星期。」
股票傳心師同事A今個星期用最悲慘嘅方式重覆咗以上呢句對話幾次，玩具龜「布歐」顛覆了香港人對傳心師嘅信任，但我對股票傳心師絕無失去信心，因為佢今次只係賺少咗，但都有賺錢，炒股目的都係贏錢，絕無高低之分，Right？反而我覺得香港政府同林鄭新班子，更加需要一位傳心師。
香港人生活艱難，政府懶理，十年前袋一萬月薪，係可以畀家用，仲儲到錢旅行結𥲑買樓，但十年後嘅今日，拎住一萬嘅年輕人，莫講養家，養自己都唔多掂。
土地問題已經講咗幾年，林鄭新班子上任兩星期唔夠，就急急腳推新招，要起合法劏房，新任運房局局長陳帆講起細個時都住板間房而流下眼淚，筆者都有少少感動，相信財爺陳茂波都有流下男兒淚，不過係開心嗰隻。
唔知邊位顧問做林鄭嘅土地傳心師，解決住屋問題竟然係做合法劏房，甚至同屋共住，將香港回到四、五十年前的「七十二家房客」，呢條絕世好橋，唔知創科局局長楊偉雄有冇份獻計。
被人問點解決住屋問題，林鄭經常回答「香港是需要增加更多土地，興建更多資助房屋」，講到底，都係想向郊野公園開刀。
林鄭自己都話要起資助房屋，其實政府都做咗，喺啟德興建咗啟晴邨同德朗邨，旁邊起咗煥然一居後冇再繼續擴建，其實旁邊土地仲可以起多幾條啟ｘ邨，德ｘ邨，總好過變成啟德一號，同埋天價嘅「海航員工宿舍」。
香港要起多啲青年旅舍都唔批准，轉個頭就話起合法劏房，呢啲雙重標準，不合邏輯嘅政策，顯示出林鄭班子嘅「劏房傳心師」，其實同最近紅爆嘅動物傳心師一樣可笑。
斯郎
https://www.facebook.com/oneroadonebelt/
本欄逢周四刊出
斯郎
~TITLE_S~一路一帶 - 斯郎 2017年7月13日 舊文
來源 source: http://hk.apple.nextmedia.com