財金冒險號：狀元讀醫有遠見
■香港醫生社會地位奇高，DSE狀元幾乎清一色打算讀醫科，毫不奇怪。 資料圖片
中學文憑試（DSE）6個「狀元」同12個「榜眼」，幾乎清一色打算讀醫科，本來毫不奇怪，但竟然被某「10優港姐前男友兼前大律師」批評思想狹隘。高材生想做醫生，當中有幾人夢想懸壺
濟世、有幾人睇錢份上，只有自己知，就算全部都為錢途讀醫，都唔怪得佢地，只怪社會有病。
病態一：樓價離地。香港人從來都功利，搵錢至上，喺樓價飛升嘅今日，情況尤甚。買唔起樓嘅，一係成世同父母住，一係擔心年年被加租，而為咗買得起樓，除非好似嗰位前大律師咁有家底，否則唯有寄望有份薪高糧準的工，醫生係不二之選。
醫生一定唔係搵錢最多嘅，未必及得上投資銀行家，亦唔似得搞間科網 startup一夜致富，無乜可能三十出頭就豪擲一億買豪宅Mayfair，但一定係最穩定嘅高薪行業，無周期性，唔驚金融風暴，亦唔怕大陸人落嚟爭飯碗，因業界反對輸入外地醫生。
病態二：醫生社會地位奇高。仁心仁術嘅醫生，當然值得尊敬，但行行都有好人壞人，醫生都有敗類。唔知點解，醫生喺香港彷彿有光環，連民政事務局長、大學校長之類同醫學無關嘅職位，都搵醫生做。單憑醫科生嘅身份，喺大學識女仔都易啲。
DSE放榜後選科，有如買四、五年後至可行使嘅期權。世界變得太快，幾年後嘅事邊個知？潮流興人工智能、FinTech，但現在讀呢啲，會唔會好似千禧科網泡沫年代揀讀電腦工程？「狀元」都係叻仔叻女，都係讀醫最有保障。
笑笑生
http://fb.com/sneeringman
本欄逢周五刊出
笑笑生
財金冒險號 - 笑笑生 舊文
來源 source: http://hk.apple.nextmedia.com