操盤手劄記：美息誘惑金融股俏
■宏利係上次美國加息周期嘅股王，走勢上呈現頭肩底及三重底利好訊號。 資料圖片
港股連升6個月，但月線圖6月出現十字星；7月雖然開門紅，但轉頭就衰喺騰訊（700）手上，之後喺大行力撐騰訊下拗腰重上水面。恒指喺25500至26100上落營造三角形，周二跌穿
底部，25557支持變阻力，周三收25521，未企返上去，走勢未改善。
外圍方面，周四美國聯儲局公佈6月議息紀錄，兩周後則有日本央行、歐洲央行議息，收水係大勢。不過，市場最關心係美國周五公佈嘅6月就業報告，睇嚇經濟係咪持續好轉，令聯儲局大條道理加快加息、縮表步伐。
新經濟股王騰訊有難，俾官媒鬧爆，「王者」變罪人，港股後市就要睇舊經濟股王滙控（005）台戲。大笨象滙控係大媽愛股，近月象鼻狂吸北水，睇港股通，滙控第二季錄得230億元淨流入，單計6月就錄得71億元；踏入7月，本周三日分別錄得12.3億元、16億元、12億元，佔股份成交33%、31%、34%。
點解大媽咁捧滙控場？英鎊滙價係原因之一！滙控普通股喺香港、倫敦上市，香港股價今年嚟升23%，倫敦只升14%，皆因英鎊兌港元升咗5.7%，故此落注滙控某程度上等同落注英鎊！而兌美元滙價，英鎊今年嚟升4.9%，人民幣只升2%，大媽搬錢嚟買滙控可以理解。
喺恒大（3333）、長汽（2333）、綠城（3900）三役，大媽暴力拉升股價戰績彪炳，不妨跟大媽搵食，吼位搭轉順風車。滙控今輪升勢，始於上周「摩笛」吹奏，話滙豐錢多，可以用嚟派息或回購嘅錢高達330億美元；加上又係美國加息同金融鬆綁嘅受惠股，料會繼續跑贏大市。不過，要留意沽空比率同英國脫歐對鎊滙嘅影響。
滙控7月31日公佈中期業績，如果你唔老黎靠慳嘅業績同靠回購支持嘅股價，可以考慮其他同樣受惠於美國加息嘅國際金融股，例如宏利（945），該股係上次美國加息周期嘅股王，走勢上，更呈現頭肩底及三重底利好訊號。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com