爭身家不如分身家
2017年07月06日
港股經過前日大跌後反彈，但吸睛嘅話題似乎係鷹君系，皆因系內持有朗豪坊的冠君產業信託(2778) 宣佈有意出售寫字樓大廈，令人產生分身家聯想，股價因而大升。
太君驚愕 市場受落
鷹君(041) 旗下的冠君前晚發出通告，表示可能出售
朗豪坊辦公大樓物業項目，並已委任第一太平戴維斯(香港)探討出售之可能性。事後鷹君羅太君話事前唔知放盤決定，仲話表示驚訝。若冠君真的出售該物業，會套現大量資金，若用作派息，鷹君將會有重大股息收入，所以昨日股價急漲。鷹君收市報40.04元，升5.2%； 冠君更勁，收報5.37元，大升9.2%，市場反應證明對放盤消息好受落。
冠君集團透露放售旺角朗豪坊寫字樓，呢項資產係成個信託唔算係最值錢嘅項目，但都估值200億元。現時鷹君持有近51%冠君，若然按股比計及套現所得有近100億元，以鷹君市值只有277億元計，折合每股套現近16元，相當和味。
市場人士估計今次賣產除左同寫字樓市價急升有關，可能同家族最近爭產有關。鷹君羅氏家族最近鬧風波，由於家族成員好多都有頭有臉，特別受到注目。陸羽仁上周在慶回歸一個威水場合撞到事件其中一個主人翁，佢坦言好痛心今日出現咁嘅場面，仲爆話羅家太君幾個月前先整親腰骨，而家咁樣勞碌奔波，佢都好擔心。
主人翁仲自爆，家族有人游說羅太君打官司，撤換家族資產信託人滙豐，目的之一相信係想重寫信託，屆時唔排除會剔除當中個別受益人，重新分配家產。不過，佢相信要達到呢個目的唔係咁易，發起行動嘅家族成員可能都明白。不過，對方或者都準備長期作戰，預備打番十年、八年官司。
鷹君爭產呢啲家事，外人多數分唔到誰是誰非，抱住剝花生睇戲嘅心情，但大家都好認同其中一位公子羅康瑞所講，瘦田無人耕、耕開有人爭。鷹君呢十幾二十年係羅嘉瑞主政下，資產不斷增多，尤其係六四後投到花園道三號嘅項目，同之後發展朗豪坊項目，將家業發揚光大，變成資產近千億元嘅王國。呢次將物業放盤，羅太君話驚訝，其實佢一把年紀，公司嘅事邊理得咁多，主人翁就話佢所講嘅嘢，十居其九都係俾身邊人影響嘅啫。
從小股東嘅角度，邊個搞得公司好，邊個肯益小股東就係好主席，所以如果今次鷹君趁住市道好賣產分身家，各人可以息爭，小股東能夠坐享其成，咁就真係大團圓結局，只不過，世事有無咁理想就好難估啦。
騰訊V彈炒即日鮮
大市昨日除左鷹君系因為放盤消息急漲，其他股份只係個別發展。恒指收報25521，升左132點；國企指數收報10380，漲74點，成交843億元。
騰訊(700) 成交仍然居首，受手遊風波影響昨日開市再插，唔夠15分鐘低見260.4元，一度再跌3.3%，不過之後拗腰彈，一個鐘內轉升，股價最後上升0.67%，收報271元，比低位升番10.6元，真係低位夠膽揸，炒即日鮮都都可以落車。外資唱淡內地電訊股，中國移動(941) 逆市跌咗1.3%，收報81.1元；中國聯通(762) 仲衰，急跌逾4%，收報10.8元。
陸羽仁
金融High Tea 舊文
來源 source: http://hdfin.stheadline.com