收市閒情：給債仔樂視的信
■呢件T恤，道盡樂視債主心聲。 互聯網圖片
「對（樂視）這麼明顯的龐氏騙局都不能看出來的，不配在投資圈混，也不合適創業。」呢句說話連馬化騰都讚好。而我今日，要代朋友朗讀一封信，一封可歌可泣嘅追數信……
親愛的樂視：
如果我同你係情侶關係，一年嘅歲月，以現今
社會效率計，應該已經可以發展到結婚生仔嘅地步，可惜，你只係我嘅債仔，而我只係一個小小嘅債主。你可能會唔記得我，我係上年初曾經仆心仆命，幫你喺香港度橋嘅公司仔。
我明白，你睇到我張單時會心諗，「得嗰幾皮嘢，行開啦！我共欠人300幾400億人仔呀！」係嘅，幾皮嘢你可能視如糞土，但你都唔好走我數！
我唔係冇盡過債主嘅責任，你第一個月唔找數，好，我信你，話曬係上市公司；第二個月唔找數，我都算，話曬你天價買英超；到第三個月，大哥呀，有英超睇我都要出糧架。正所謂「借錢梗要還，追數搵中介」，出唔到糧我咪出信囉。
律師信一出，好快有回覆，你哋仲清晰地畀咗個「還錢路線圖」，我又如期收到第一筆數（其實都遲咗幾日），搞到我沾沾自喜到一個點，仲同行家講：「喂！出律師信追數係Work！」可惜，結果係我一直都收唔到尾數。阿媽教落，追數靠追魂Call，我終於得到回音，但正式回應竟然係：「不如你入稟小額錢債」。
天啊！我唔理係龐氏定樂視，總之欠債還錢，天經地義。你話，我點會估到你上市公司數變爛賬？我知錯啦，中資信唔過，但我真係估到一間市值億億聲嘅公司，竟然放棄治療到叫我去小額錢債！
美國有間電動車公司，以科學家命名，叫Tesla；樂視都有間電動車公司，又用科學家名改名，但畫蛇添足加多粒字，叫Faraday Future，簡稱「FF」。今日睇新聞，連樂視新買家融創都話受查。望住呢兩個F，我知道，成功追數嘅希望，只係Final Fantasy，而呢兩個F以外，我想說另一個F。
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com