Money Walker：財金官員另一面
■科恩被視為耶倫接班人大熱人選。 資料圖片
聯儲局主席耶倫任期僅剩半年，有傳總統特朗普屬意提名白宮國家經濟委員會主任科恩（Gary Cohn）接任。筆者認為，耶倫冇得留低有啲可惜，因為佢任內同市場溝通方面做得唔錯，除2013
年嗰次「收水驚魂」外，之後於進行收水同宣佈縮表上，都未有造成市場震盪，一直準確調整市場對貨幣政策預期。
上周耶倫出席國會聽證會，表示科技變化同全球化導致美國中產階級正在消失，言論反映耶倫夠貼地，有留意到社會大趨勢對就業市場嘅影響，亦會喺幣策決策上考慮社會因素，並非一味只懂研究經濟數據。
至於傳聞大熱接任人科恩，本身並非讀經濟學出身，但分析認為，佢喺高盛嘅投行經驗對聯儲局工作有幫助，亦相信佢喺金融界打滾多年，點都掌握基本經濟概念，但近日有報道卻指科恩唔係咁熟書。
事緣科恩去年接受《華爾街日報》訪問時，曾表示瑞士央行過去幾年意圖推動貨幣升值，直至2015年初先結束。但事實剛剛相反，2011年歐債危機爆發後，資金湧入瑞郎避險，瑞士央行因貨幣湧現升值壓力不利經濟，決定同歐元掛鈎，直至2015年先宣佈「脫歐」。不過科恩就誤會瑞士央行2011年與歐元掛鈎，係讓瑞郎升值之舉。
科恩係咪唔識睇滙率走勢圖而鬧出笑話冇人知，筆者只知有經濟學背景同多年財金經驗，唔等於有經濟學思維，好似本港金管局前總裁任志剛，亦曾提過有違經濟學常理嘅獨特觀點，例如指出社會主義市場經濟較資本主義優勝、港元應與人民幣掛鈎等，背後理據同樣令人費解。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com