金手指：最驚資金鏈斷裂
■股市由最高點崩潰，最直接原因一定係資金鍊斷裂。 資料圖片
孫柏文由中三開始炒嘢，都從未試過摸唔到市向之下，揸咁重貨。原因，可能係人老了，經驗多咗（特別係交功課嘅經驗），冇咗以前嗰種盲勁，不過本身又自覺功力已達隨時能抽身之境地。又或者個市老早已達書本上所講，冇可
能咁貴兼貨幣政策唔就嘅情況下，都不斷上升，中咗貪婪之伏而追。
點都好，股市由最高點崩潰，可以一百幾廿個理由。不過最直接，一定係股市資金鏈斷裂。周末時，就傳來消息，話傳聞中最喜愛睇住自己啲客盤路「搵錢」嘅Interactive Brokers，將會喺8月花旗國股市衍生工具到期日後，大幅收緊拋空「波幅指數VIX」嘅孖展量。
唔知係咪拍斷駝背之最後根稻草，不過時間同個市要開始驚9月縮表脗合。仲有十幾日，下周先再睇。都係嗰句，我揸重港交所（388），如沽出，會喺我FB即時通知。
噚日，見David Webb學馬丁路德咁，喺港交所門釘上十三要求。話呢樣嗰樣。講真，創新板、創業板、主板，乜板都冇用，一日港交所玩曬，都係死得。唔使咩Fiscal Drag，香港都會輸大陸經濟，因資本分配系統冇競爭，所以冇效率。
我成日都強烈要求，政府發個賭牌畀Webb，等佢鍾意點搞就點搞。不過唔會發生，因Webb可能只係「講就天下無敵」，加埋政府上下都係填鴨教育精英，睇舖睇到第三代，係時候我哋氣數已盡。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com