Can Bank - 散子 2017年8月8日
Can Bank：如何避開DQ股
■港交所今次DQ華多利，唔多唔少都有啲殺雞儆猴嘅味道。 資料圖片
噚日朝早未開市，港交所（388）披露易就有新嘢，一直成交不多的華多利（1139），一下子被港交所DQ，成為主板首例，本報報道起碼仲有十隻排緊隊，今次DQ潮熱鬧程度，相信可媲美立法會。
事實上，之前確實有唔少人靠殼股搵食，講嘅唔完全係買定等賣殼嘅散戶，亦都包括一啲管理層，散子之前就聽過唔少炒殼股嘅人，入定一批「目標公司」嘅股份，甚至入埋董事會做埋管理層，唔做嘢就淨係等，等一個被買起嘅機會。當然，有人咁做，自然係有人因為咁而發過達。
從監管機構角度，究竟有幾多「武器」在手可以將殼股DQ？根據上市規則第六章就指定在四種情況下交易所可以採取行動，1.上市公司未能遵守上市規則而交易所認為情況嚴重；2.交易所認為公司公眾持股量不足；3.交易所認為公司無足夠資產保證其可繼續上市；4.交易所認為公司或業務不再適合上市。
第3種就係今次華多利的情況；亦都係在無違反上市規則之下，最容易可以釐定係咪應該除牌嘅一種情況，第1種：違反上市規則亦相對簡單；至於第2種情況，公眾持股量不足，其實港交所不時都有公佈這些公司，留意下就可以避開（如果閣下真係想避開的話）。
最難釐定的一定是第4種情況，因為大家都唔係好明呢個算係咩情況，換言之，呢個情況爭議一定大，今次DQ殼股唔多唔少都有啲殺雞儆猴，搵啲咁有爭議概理由去DQ，對交易所嚟講冇乜著數，反而用第3種，DQ咗大家都覺得理由充份，而且亦相對容易有證據，如果大家有炒開殼股嘅，不妨留意下今次華多利的例子。小心駛得萬年船。
散子
本欄逢周二刊出
Can Bank - 散子 舊文
來源 source: http://hk.apple.nextmedia.com