買啱兼坐得定 說易行難
2017年08月08日
港股再升，火車頭仲係騰訊(700) ，喺公司股價高處未算高下，公司創辦人馬化騰嘅身家，據報已超越阿里巴巴主席馬雲，不過最大受益者並唔係馬化騰，而係騰訊大股東南非基金。
騰訊將會喺下周三(16日)公佈中期業績，大行摩根士丹利擺明玩偷
步炒業績，預先上調騰訊目標價19.4%至370元，理由係集團第二季遊戲收入按年可增加45%；按季升9%，當中手機遊戲收入將按年升65%至158億元人民幣，再創紀錄新高。報告仲話騰訊嘅「王者榮耀」七月收入創紀錄新高，反映受監管影響有限。前景方面，騰訊正為微信朋友圈進行測試，以提高一線城市嘅廣告流轉量一倍，預期朋友圈同騰訊新聞變現收入嘅步伐將會加快。
騰訊南非股東賺近萬億
騰訊股價升不停，噚日曾經高見321.4元再創新高，收報320.6元，升2.95%，為升幅最大藍籌股。創辦人馬化騰身家水漲船高，據《福布斯》實時數據，馬化騰個人財富達361億美元(約2815.8億港元)，超越馬雲嘅356億美元(約2776.8億港元)，成為中國首富。馬化騰持有公司8.7%股份，身家已經逼近3000億元，公司主要股東南非MIH TC，持有嘅股價達到33.2%，市值超過9813億元，真係肥到着唔到襪！
同騰訊老臣子傾起，佢地都對呢間南非公司股東持貨嘅耐力寫個服字。佢話MIH由傳媒巨頭Naspers擁有，唔係一開始就投資騰訊，而係分兩次收集。騰訊成立無耐，IDG同盈科數碼分別向騰訊投資220萬美元，各佔騰訊20%股份，2001年6月盈科數碼以1260萬美元將持有嘅騰訊股權悉數出售畀MIH，係公司首度入股；2002年6月，騰訊控股其他主要創始人又將自己持有嘅13.5%嘅股份出讓給MIH，之後公司只係試過少量減持，絕大部份嘅股價都無郁過。MIH投資騰訊股權總共花咗約3200萬美元，約等如1.95億港元，相信其後透過減持已收回成本，而家近萬億嘅投資接近全部淨賺，所以可能係股票史上賺錢最大宗嘅交易之一。投資格言金句中嘅金句係Sit right and sit tight(買得啱兼夾坐得定)，但呢樣嘢真係知易行難，若果MIH唔係一間上市公司而係個人，相信都坐唔到咁耐。
騰訊今年咁喪升法，令好多股民都出左局，無貨者亦唔敢追貨。佢嘅升勢同時帶動恒指持續上揚，中環茶友笑言，莫講話喺低位買騰訊食胡誘惑大，佢喺恒指兩萬點撈左啲盈富基金(2800) ，叫佢唔食胡都好難，有食唔食，罪大惡極，試問有幾可會遇到一隻騰訊先？所以佢嘅策略始終都係分段食胡，寧願等日後有機會再低吸買過。
丘鈦科技問鼎10元
噚日單係一隻騰訊已為恒指貢獻88點升幅，大市收報27690，升127點；國企指數收報11054，升51點，成交只有802億元。部份科網股隨騰訊起舞，美圖(1357) 升6.5%，報11.78元；鑫網易商(1039) 升0.8%，報1.25元；博雅(434) 升1.3%，報3.18元。手機設備股續造好，瑞聲(2018) 升1.9%，報110.4元；舜宇(2382) 升5%，報97元；丘鈦科技(1478) 升11%，報9.65元。從事中高端攝像頭模組、指紋識別模組嘅丘鈦今年表現甚勇，屢創新高之餘，大有挑戰10元關口之勢。
其他藍籌相對淡靜，資金炒吓其他冷門啲嘅板塊，資源股仔中國鐵鈦(893) 爆升24%，報0.445元；金川國際(2362) 升14%，報1.56元；忠旺(1333) 升12%，報4.53元；中國有色礦業(1258) 升9%，報1.82元；大股中馬鋼(323) 升9%，鞍鋼(347) 升6.45%，報6.93元；五礦資源(1208) 同中國鋁業(2600) 升6%，算係比較叻。
陸羽仁
金融High Tea 舊文
來源 source: http://hdfin.stheadline.com