金手指：一注獨贏買森信
■紙印書再次增長，香港老牌公司森信紙業有得諗。互聯網圖片
閱文上市，「紙跌、數碼升」，幾廿年來都係「狗咬人」消息，即唔係新聞。點知數周前，我英國讀「數碼新聞科」上堂，講師講西方圖書銷售趨勢時漫不經心話：「紙印及電子書加埋嘅市場，萎縮咗好多年。點知喺幾年前，成
個市場見底，再次增長。而最神奇嘅地方，就係電子書銷售則見頂開始跌。成個市場再增長全靠紙印書。」嘩！人咬狗呀！
象牙塔學者講嘢，我當然唔信，所以之後係咁check。點知，真係。特別美國同英國。
點買？我第一反應當然諗印刷，大家都知紙盒多年受惠電貿增長，不過大陸閂紙廠，已燒到印刷紙供應非常緊張。今年第一季起，全球不斷加價。玖紙（2689）嗰啲，齋造紙盒。所以，今日叫大家一注獨贏森信紙業（731）。香港老牌公司，大陸有廠，即之前因跟足環保條例，被啲違規廠價格戰打殘。今日則反變「有得留低」。一半造紙盒，另一則印書紙。市盈率冇十倍、三厘股息、仲因市場共識係印刷紙業遲早瓜，股價比資產淨值折讓5成。股價噚日剛破多年高位，冇蟹貨，貨又乾。市值冇八億，首站目標價0.9元。
我對上兩隻叫一注獨贏，摩比（947）同BBI（1035），都係建議日大幅裂口高開後，用當日開市價計至今再升最多近三成。所以要贏，最緊要聽我話不問價追。最後，你明點解現金多到唔知點使嘅騰訊（700），無啦啦隊閱文上市cap水啦？
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com