大棋局：港股欠最後一升
■電訊業佔恒生指數比重6.33%，恒指要再爆上的話，最終都會炒起藍籌電訊股。資料圖片
恒指徘徊27000至28000點已近三個月，適逢今年為「7」年，1987年股災、1997年金融風暴、2007金融海嘯，10月都是股災或見頂月。加上聯儲局
開始縮表收水，歐洲央行亦很大機會要公佈縮減QE計劃，相信很多人都會躊躇，港股係咪已見頂？
10月的確有啲邪，從統計上，美國道瓊斯指數100年來，16次最大的單日跌幅，有9次都發生在10月。即係話，一係唔跌，只要大跌，有9/16機會都發生在10月；而呢9次當中，有4次發生在逢7之年。唔係一次半次，而係美國股市近100年歷史數據統計。美股升香港可以唔跟，但美股大跌香港多數跟到十足。不過一體兩面，逢7之年10月的背面，也往往代表指數見最後一升之頂。
央行收水縮表方面，聯儲局今年底前每月縮表100億美元，估計歐洲央行就算宣佈縮減QE早期力度亦細，對市場影響不大。聯儲局縮表及美國稅改美元回流的威力，要明年中後先顯現，此部分日後再談。
恒指雖然升穿2015年大時代高位，但有兩個板塊仍然未鬱。一個係電訊業，另一個係能源業。電訊業睇落冇乜增長潛力，現在有時甚至被當作公用股睇。但電訊業佔恒生指數比重6.33%，恒指一係唔升，恒指要再爆上的話，最終都會炒起藍籌電訊股，唔需要甚麼理由，只要用嚟挾指數就夠。
另一個落後板塊為石油業，包括石油同天然氣相關的。今年提過幾次美國的能源布局，石油同天然氣價格已經見底，現處於易升難跌趨勢。石油及天然氣藍籌股佔恒生指數比重5.26%，同樣地，恒指要挾上去的話，始終會鬱石油股。因賭期油而輸到仆直的國泰航空（293），近期股價亦靜靜起革命。上述兩個板塊夾埋佔恒指比重11.59%，若見其開始鬱，那最後一升應該嚟料。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com