晶片股炒一轉
2017年10月24日
日本大選塵埃落定，呢次冇出現令人意外嘅黑天鵝。執政聯盟喺選舉大勝，安倍有機會成為日本任期最長嘅首相，日股升1.1%。
陸羽仁之前同日本駐港官員傾偈，佢大力唱好當地經濟，話上季日本經濟有差唔多4%增長，經濟有番活力。日本啱啱公佈咗八月領先指標終值，經季調後為107.2，初值106
.8，創2014年2月以嚟新高。呢個幅度喺發達國家嚟講，應該都算幾驕人，特別係日本人口老化，經濟唔係咁夠活力。由此證明大水漫灌，對經濟點都有啲作用。
喺經濟稍有起色嘅情況下，首相安倍晉三馬上提前大選，結果佢領導嘅執政聯盟，取得壓倒性勝利，預期未來仲會維持超寬鬆貨幣政策。日圓受影響下滑，兌美元喺周一早段跌至三個月低位，圓匯轉弱有利出口，利好日股，但就唔一定對區內其他股市有利。但無論如何，安倍政府繼續執政，放水政策持續，間接令到全球繼續水浸。
日本經濟呢兩年好番啲，但日本企業好多仲係苦苦掙扎，好似東芝將截至出年三月底止全年業績預測，由之前預測錄得盈利2300億日圓，調整至虧損1100億日圓(約75.5億港元)，主因出售晶片業務造成3400億日圓稅項影響，之前預測冇包括呢個項目。東芝重申，若果成功出售晶片業務有助恢復公司淨值，該公司計劃11月9日公佈第二季業績，並指業績表現良好。
東芝出售晶片業務，傳過唔少外資有興趣。依家科技概念當道，內地熱搞人工智能，有基金經理認為晶片股會間接受惠，所以近月內地晶片股都有啲炒味。上市多年都浮浮沉沉嘅中芯(981) 噚日逆市升咗1.36元，升3.5%，收報10.8億元。
管理層喺年度報告聲稱，公司正處於增長階段，應對有關先進同成熟線寬產能廣泛需求，目標喺二○一六年至二○一九年達至20%年複合收益增長率。今年第二季業績錄得期內股東應佔溢利3630萬美元，每股基本盈利0.0078美元。現價市盈率15.6倍，比國際同業水平高。只係晶片股係內地股民都鍾意炒作嘅板塊之一，佢嘅市值有502億元，所以都有唔少衍生工具，炒起上嚟特別有味道。
除咗晶片股，大市噚日主要係炒個別。內地股市造好，上證指數收報3380點，升2點。深證成指收報11306點，升67點。大市乏力除咗觀望十九大結果，亦都因上周五強力反彈消耗咗購買力，令股市冇力再上，一開市跟美股升一升已經係全日高位，跟住就碌低，恒指收報28305，跌181點；國企指數收報11491，下滑67點，成交金額914億元。個股就有炒味，中國人壽(2628) 逆市急升。集團預期首三季淨利潤飆95%，股價高見25.75元，收報25.45元，升3.45%，貢獻恒指20點。丘鈦科技(1478) 逆市急升18%，收報18.36元。
騰訊(700) 分拆網絡文學平台閱文集團(772) 開始在本港上市路演，吸引逾250個投資者，據講會場16張台爆晒棚，唔少因為座位已滿，需要全程企喺到旁聽，場面氣勢同眾安(6060) 不相伯仲。閱文每股招股價傳約為48至55港元，上市後市值將達約436.8億至499.2億港元。以每手200股計，入場費高達1.1萬元，將會成為今年入場費最貴新股。
保薦人大摩認為，閱文定價合理，對於外界話入場費過高唔認同，閱文係具備潛力公司，有信心公開發售能夠吸納足夠認購，唔會引入基石投資者。經紀孖展預訂繼續升溫，四間券商話累計收到嘅孖展預訂額已達450億元，以公開發售集資8.33億元計，已經超額認購逾53倍。由於閱文回撥機制規定，公開發售就算超購50倍以上，最多只回撥至33%，所以未必做到一人一手。
陸羽仁
金融High Tea 舊文
來源 source: http://hdfin.stheadline.com