財路：五礦地產掂過碌蔗
■五礦地產今個上半年盈利翻半番，靚仔到痹。互聯網圖片
五礦地產（230）今個上半年盈利翻半番，靚仔到痹，而喺咁多隻央企或窗口內房當中，預測PE又係至平選擇之一，趁呢期盤整，又係兜轉時機。
五礦地產今年上半年盈利近4億元，兼相當於上年全年盈利5.1億元的77%。撇
除兩個期間嘅投資物業增值收益，上半年實際盈利3.5億元，幾乎追貼上年全年實際盈利3.88億元。仲要咁睇，五礦地產上半年毛利率去到37%，比上年同期22.4%，大幅增加，呢期盈利增長，透過內房銷售同毛利率改善，唔係靠增值非現金性收益提升，紮實到爆。
又五礦地產今年上半年內房簽約銷售總額，達到275億元人仔，折約324億港元，比上年同期88億港元，大幅增加兩倍，內房熱銷，隨住物業入賬反映，嚟緊全年同打後日子成績單，五礦地產掂過碌蔗。
唔好計多，五礦地產今年全年EPS，係上半年起個孖到0.236元，現價1.15元預測PE得4.95倍。
場內保利置業（119）今年預測PE40倍、華潤置地（1109）8.8倍、深控（604）8倍，中海外（688）7.9倍。五礦地產平咗一半！
五礦地產到今年6月尾NAV2.2元，PB0.53倍，同期土儲3,443萬平方呎，係咁意當每平方呎增值100蚊，五礦地產已經有額外34億元增值，就算唔計呢板土儲升值潛力，上邊華潤置地PB1.27倍、中海外1.1倍、深控0.75倍，五礦地產喺央企同窗口內房當中，PB同保利置業一樣咁平。
買五礦地產，當上番上邊內房行家嘅平均PB0.9倍，五礦地產現價係講緊要升41%到1.6元樓上。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com